Anadolu sadâreti pâyesiyle İstanbul kādısı ve nakībü'l-eşrâf olan Derviş Mehmed Efendi lisânını adem-i zabt ile devr-i ebvâb-ı kibâr-ı ulemâ ve ittifâk-ı ârâ ile tanzîm olunan ba'zı mevâdd-ı devlete harf-endâz-ı i'tirâz olduğunu ba'zı hayır-hâhân sâmi'a-i hümâyûna ilkā etmekle hakkında cûybâr-ı teveccüh-i mülûkâne mütegayyir olup işbu şehr-i Şa'banü'l-mu'azzamın ondokuzuncu perşembe günü müddet-i nâkısa ile azl ve li-ecli't-te'dîb Gelibolu'ya tağrîb olundu. Sâbıkā (272-a) Mekke-i mükerreme kādısı Re'is-zâde Âşir Mustafa Efendi'nin hüsn-i sülûk ve ülfeti ve hâkim olduğu bilâdda âlem-pesend olan sît ü şöhreti benî nev'i beyninde mûmâ-ileyhe medâr-ı füzûnî-i kadr ü i'tibâr olduğundan gayri fî-hadd-i zâtihi müteşerri' ve mütedeyyin ve ilmi mütebeyyin bir zât-ı melekiyyü's-simât olmağla yevm-i mezkûrda İstanbul kādılığı ile mümtâz-ı akrân ve Veli Efendi-zâde dahi İstanbul pâyesiyle cezlân olup câh-ı vâlâ-yı nekābet dahi vâlâ-haseb [ve] mazbûtü'n-neseb hilye-i salâh ile ârâste ve zîver-i zühd ü takvâ ile pîrâste İstanbul pâyesi olan Kâmil Efendi'ye tevcîh ve ihsân olundu.