Kethüdâ-yı sadr-ı âlî olan Feyzi Süleyman Efendi'ye sadr-ı sâbıkın nazarı olduğundan bundan akdem Bekir Bey'in nukûlü esnâsında kethüdâlığını telhîs ve istîzân etmişidi. Efendi-i mûmâ-ileyhin kâffe-i ahvâli mücerreb-i etvâr-ı enâm ve muhteber-i evzâʿ-ı hass u âmm olan pâdişâh-ı dârâ-gulâma maʿlûm olmakdan nâşî kethüdâlığını tecvîz buyurmayup müşârün-ileyh tarafından tekrâr niyâz olundukda etvâr-ı sâbıkasından ferâgat ve aʿlâ ve ednâ ile hüsn-i muʿâşeret ve hizmet-i devlet-i (272-b) ebed-müddetde sadâkat ve istikāmet etmek şartiyle kethüdâlığına müsaʿade-i hümâyûn erzânî buyurulmuşidi. Çok geçmeden sadr-ı sâbık maʿzûl ve sadr-ı cedîd vusûl buluncaya dek kûşe-güzîn-i humûl olup sadrıaʿzam hazretleri Âsitâne-i saʿâdet'e pâ-nihâde-i izz ü şeref oldukda şâyed evzâʿ-ı sâbıkasından rücûʿ etmişdir deyû mûmâ-ileyhi kethüdâlıkda ibkā buyurmuşidi. Mesnedinde sebât ve takarrürü hiss etdiği gibi hâssa-i lâzımesini icrâya mübâşeret ve tenfîr-i kulûb-ı nâsa mübâderet etmekle و لن يصلح العطار ما أفسد الدهر mefhûmu üzere ıslâhından ye's ü nevmîdi hâsıl ve işbu şehr-i Şaʿbânü'l-muʿazzamın yirminci cumʿa günü kethüdâlıkdan munfasıl olup câh-ı mezkûr bundan akdem bu defʿa dahi kethüdâ-yı sadr-ı âlî ve hâlâ re'îsülküttâb bulunan Esseyyid Mehmed Hayri Efendi hazretlerinin zât-ı meymenet-simâtlarıyla kesb-i şeref-i nâ-mahsûr edüp riyâset-i küttâb hizmeti Dîvân-ı âlî'de çavuş-başı olup memdûhü'l-fiʿâl ve mergûbü'l-hisâl olan Mîr Atâullah Efendi hazretlerine tevcîh ve peder ü cedlerinin makāmlarını ihrâz ile kadr ü iʿtibârı terfîʿ ve tenviye ve çavuş-başılık hizmeti ile dahi Rûhî Süleyman Ağa'nın dâire-i maʿîşeti terfîʿ olundu. (273-a)