Mûmâ-ileyh an-asıl zümre-i kuzâtdan olup Karinâbâd'dan mutavattın ve refâhiyyet-i hâl ile beyne'l-ahâlî müteʿayyin iken hubb-ı câh belâsıyla tağyîr-i terîke meyl ü rağbet ve bu ümniyyenin husûlünü mevkūf-ı vakt-i fırsat etmişidi. Silistre muhârebesi akabinde Balya boğazının tez elden muhâfazası lüzûmunu hiss etdiğine binâen ikiyüz elli nefer piyâde ile emr-i muhâfazaya şitâb ve cânib-i mîrîye yirmi kese teslîm edeceğini işrâb ve mukābelede bilfiʿil kapucu başılık ile kâmyâb olmasını istidʿâ ve Baht Giray Sultanı dahi dâmen-gîr-i şefâʿat ve ilticâ etmekle asker ve cihet-i diğer ile husûl-i nefʿ-i mükerrer mukarrer olduğuna binâen mûmâ-ileyhe kapucu başılık ihsân olunup müteʿahhid olduğu askeri Karinâbâd kazâsından taleb ile ahâliyi hân nâ hâh bedel iʿtâsına mecbûr ve kendi biʿn-nefs hânesinde ikāmet ile tertîb-i esbâb-ı râhat ve huzûr edüp bir müddetden sonra Aydos ve ol havâlîden dakīk mübâyaʿasına me'mûr olmağla cemʿ etdiği dakīki der-anbar etdikden sonra naklini istîzân ve nakl olunmadığı sûretde kesb-i merâret ile ekle salâhiyyeti olmayacağını beyân edüp tarafına haber-i şâfî varmadığından umûrunda mütelâşî ve havf-ı gazab-ı pâdişâhîden mütehâşî olmuşidi. Nâçâr bir defʿa hakīkat-i hâli ihbâr eyledikde dakīk-i mezkûr peksimed tabh olunmak irâde ve tûl-i zamân ile merâret ve sevâd kesb etdiğinden peksimed tabhına dahi el-vermeyeceğini ifâde etdikde ihzârına mübâşir taʿyîn olunup Âsitâne-i saʿâdet'e geldikde arz-ı merâma gereği gibi kudret-yâb olamayup eceli dahi hulûl etmiş bulunmağla işbu şehr-i mezkûrun onaltıncı perşembe günün saray meydânında alâ-mele'i-n-nâs cezâsı tertîb ve binâ-yı nâ-üstüvâr-ı ömrü tîşe-i kazâ ile tahrîb olundu. (267-b)