Rumeli ve Anadolu'da vâkiʿ olan kısmet-i askeriyye sadreyn-i muhteremeyn hazerâtına müfavvaz ve kısmet-i mezkûre müşârün-ileyhimâ taraflarından cânibeynde vâkiʿ mevâlî ve hükkâma bedel-i mefrûz ve mukadder ile ihâle ve baʿzen cesîm kısmetler vukūʿunda mahsûs muharrer gönderdikleri dahi mesbûkü'l-misl olup binâen-alâ-zâlik bundan akdem kuds-i şerîfde hâlik olan neccâr Kosti nâm zımmînin temhîr eylediği gibi Kuzguncuk'da olan hânesini dahi sadr-ı Anadolu temhîr eyledikde Üsküdar kadısı Kebîrî-zâde izhâr-ı tayş ü hiffet edüp mührü fekk ve me'mûrları tard eylediğinden müşârün-ileyhe kısmeti tefrîk ve bâ-işâret-i aliyye Üsküdar'a kassâm nasb etdirmekle icrâ-yi lâzıme-i terhîb ve tazyîk etmişidi. Efendi-i mûmâ-ileyh müktesebi olan hakārete tahammül edemeyüp mahkemenin der ü dervâzesin sedd ve ashâb-ı daʿvâyı ünf ü nahvetle redd eylediği sâmiʿa-i evliyâ-yı devleti karʿ etmekle azl ü nefyine eğerçi karar verilüp ancak sinîn-i çendinden berü nigeh-endâz-ı tahassür ve iştiyâk olduğu mansıbın nemâsından hırmânı revâ görülmeyüp mansıbı niyâbete zabt ve hâsılâtı tarafına verilmek üzere şehr-i mezkûrun beşinci cumʿa günü Bursa'ya nefy ile te'dîb olundu. (267-a)