Mîr-i mûmâ-ileyhe zikr olunan Çirmen sancağı mukaddemâ nân-pâre mukābili ihsân olunup bir müddetden sonra yedinden nezʿ ve ber-vech-i mansıb-ı âhara tevcîh ve refʿ olunmuşidi. Mîr-i mûmâ-ileyhin fi'l-asıl îrâd-ı tabîʿîsi olmayup medâr-ı maʿâşı dahi refʿ olunduğundan fakr u fâkeye mübtelâ ve birkaç defʿa rikâb-ı kâm-yâb-ı mülûkâneye bâ-arz-ı hâl bess-i şekvâ etmekle hizmet-i sâbıkasına hürmet ve hâl-i perîşânına merhamet zımnında şehr-i mezkûrun onaltıncı pazar günü Çirmen sancağı ber-vech-i te'yîd mûmâ-ileyhe tevcîh ve ihsân olunup mutasarrıf-ı sâbıkı olan Muhtar Paşa-zâde Mehmed Paşa'ya Üsküb ve bir gün sonra Uzun Abdullah Paşa-zâde Abdullah Paşa'ya Kırşehri tevcîh olundu.