Dergâh-ı âlî kapucubaşılarından olup Tophâne ve Midilli nâzırı olan Süleyman Ağa'nın Midilli'de olan vekîli kefereye revgan-ı zeyt fürûhtiyle ithâm olunduğuna binâen kendüsü bizzât cezîre-i Midilli'ye azîmet ve nezârete dâir olan umûru rü'yet etmek irâdeleriyle şehr-i mezkûrun onaltıncı pazar günü Tophâne nezâretinden azl olunup ber-vech-i muharrer Midilli cezîresine taʿyîn ve sâbıkā Galata voyvodası Elhâc Mustafa Ağa mûmâ-ileyhe câ-nişîn oldu. Midilli nâzırı mûmâ-ileyh ile tütün gümrükcüsü Emin Ağa'nın mezreʿa-i ümîdleri bir sâkiye-i dâ'imetü'l-feyezân imdâdiyle hûşe-dâr-ı husûl olup ancak fi'l-asıl miyânelerinde nâr-ı münâfese ve münâkaşa müştaʿil ve ahad-i hümâ âharın füzûn-ı kadr ü iʿtibârına münfaʿil olup binâberîn gümrük-i duhân ile mâniʿatü'l-cemʿ hisbân olununan baş-bâkī kulluğu mansıbı bu defʿa Emîn Ağa'dan refʿ olundukda Süleymân Ağa kemâl-i inbisâtından terâne-sâz-ı sürûr ve destede-i tarab u hubûr olup bu şemâtet-i nâ-bercâ Emîn Ağa'ya münʿakis oldukda azlinden ziyâde dil-teng-i elem ve sîne-kûb-ı derd ü gamm olmuşidi. Zamân-ı yesîrde ağa-yı mûmâ-ileyhin tecerrüʿ-i zehrâbe-i azl ile telh-kâm ve müstakillen Midilli cezîresine mıkzâf-ı cünbân-ı iʿtizâm olması izhâr etdiği şemâtetin cezâsıdır.