Âsitâne-i saʿâdet ve memâlik-i mahrûsede mütemekkin olan elçiyân ve konsolosların bâ-berevât-ı aliyye maʿdûd ve muʿayyen tercümânları olup dâimâ taraflarında ikāmet ve hizmet-i lâzımelerinden gayri umûra ʿadem-i mübâşeretleri şurût-ı muʿâhededen iken bir müddetden berü reʿâyâ-yi Devlet-i aliyye'nin ağniyâ ve akviyâsından baʿzı fesâd-pîşeler elçiyân-ı düvele intisâb ve kuvvet-i mâliyye ile tercümânlık muʿâfiyetini iktisâb ve hâric-i Âsitâne'de bulunan (263-b) konsoloslar dahi o makūleleri istishâb ile umûrlarmı iltizâm ve bu mülâbese ile zikr olunan eşhâsın her biri birer mahalde ârâm ve tegallüben umûr-ı beldeyi rü'yet ile reʿâyâ-yi zaʿîfetü'l-ahvâli izrâr ve gûnâ-gûn mefsedet ve melʿanetlerin izhâr eylediklerine binâen nizâm-ı hâl-i reʿâyâ muhtel ve belki mizâc-ı mülk ü devlet muʿtel olup te'kîd-i sâbıka-i şart ile bu keyfiyyet bir râbıta-i kaviyyeye rabt olunmadığı hâlde aktâr-ı bilâd-ı islâmiyyede yevmen fe-yevmen fesâd müzdâd olacağını hayır-hâhân-ı Devlet-i aliyye mülâhaza ve der-yâd etmeleriyle fî-mâ-baʿd gerek Âsitâne'de ve gerek sâir memâlik-i pâdişâhîde âsûde-nişîn-i emniyyet olan elçiyân ve konsolosların tercümânları umûr-ı belde ve reʿâyâya taʿarruz etmeyüp bu defʿa iʿtâ olunan mehl-i muʿayyen zarfında elçiyân ve konsolosların bulundukları mahallere gelüp hizmet-i lâzımeleriyle iştigāl ve baʿzı aʿzâr-ı vâhiye ile izhâr-ı sûret-i butûʿ ve te'ehhür eyledikleri hâlde hifze'n-li'l-nizâm te'dîb ve gûşmâl olunacakları elçilere ifâde olunmak bâbında hatt-ı hümâyûn şeref-yâfte-i sudûr olmağla keyfiyyet-i mezkûre reîsülküttâb efendi vâsıtasiyle tefhîm olunup telâkki bi'l-kabul etdiklerinden gayri lâzım gelenlere bu mazmûnda mü'ekked mektûblar irsâl eylediler.