Defterdâr-ı şıkk-ı evvel olan Süleyman Efendi ünfüvân-ı şebâbından berü umûr-ı mâliyyede nesâr-ı nakd-i ömr eyleyerek tahsîl-i taʿayyün ve iştihâr ve bâʿis-i rû-sefîdî-i dâreyn olan salâh-ı hâl ü iffet ile mahbûb-ı kulûb-ı sıgār u kibâr olduğuna binâen bundan akdem bi-hasebi'l-kābiliyye ve'l-istiʿdâd mesned-i bülend-i defterîye isʿâd olunmuşidi. Efendi-i mûmâ-ileyh bir sene mikdârı dahl ü harc-ı Devlet-i aliyye'yi alâ-mâ-yusâʿuduhi'l-vakt idâre ve rü'yet ve beytü'l-mâl-i müslîmîni tetâvül-i eydî haveneden hifz u siyânet edüp ancak bu esnâda masârifât-ı mühimmede kesret ve kısteyn mevâcibinde noksâniyyet olup cebr-i noksân (263-a) ve izâle-i zarûret-i vakt ü zamân efkâriyle muztarib ve bu derdin çâresini bulmağa mükibb iken me- vâcib-i nâkısayı min-gayr-i taʿvîz tekmîl ve müzâyaka-i mîrîyeyi baʿzı tasarrufât-ı akliyye ile mehmâ-emken vüsʿate tahvîl sûretini defter emîni Hasan Efendi taʿahhüd ve fi'l-hakīka efendi-i mûmâ-ileyh mukaddemâ iki defʿa dahi mesned-i defterdârîye tevessüd edüp her defʿasında birer gûne eshâm ihdâsiyle tevsîʿ-i vâridâta sebeb-i müstakil ve tanzîm etdiği eshâmdan vâfir mebâliğ husûliyle fi'l-cümle müzâyaka-i mîriyye mündefiʿ ve zâil olduğundan gayri an-asıl şiddet-i şekîme ve savlet ashâbından olup tahsîl-i mâlda mahâreti müsellem ve beyne'n-nâs debdebe ve mehâbeti ber-vech-i etemm olmağla taʿahhüdüne binâen işbu şehr-i Recebü'l-ferdin onuncu isneyn günü defterdarlık mansıbı ile sâlisen mâlik-i nisâb-ı sürûr ve münhal olan defter emâneti ile Lâlelili Mustafa Efendi hâiz-i rehîne-i hubûr oldu.