Bundan akdem Gelibolu'ya nefy ü iclâ olunan hekîm-başı sâbık Hayrullah Efendi mahall-i mezkûrda ber-vech-i sükûnet ikāmet etmeyüp hilâf-ı rızâ baʿzı harekete ictirâ etdiği mesmûʿ olmakdan nâşî bilâd-ı baʿîdeye tağrîbi iktizâ ve şeref-yâfte-i sudûr olan hatt-ı hümâyûn mûcibince (262-a) mûmâ-ileyh Tâif'e iclâ ve mevâlî ve kuzâta kapu kethüdâlık takrîbi ile duhûl edüp muhrib-i bilâd ve bâʿis-i zulm ü fesâd olan Kāsım Efendi dahi Cidde'ye bi-tarîki'n-nefy isrâ olundu. Hekîm-başı-i sâbıkın Tâif'e tebʿîd olunması evânında âb-ı çeşm-i fukarâ ve âh u enîn-i zuʿafâ ile ictimâʿ eden mâldan mebnî hânesinin muhterik olması isâbet-i ayni'l-kemâle mahmûl ve bâ-husûs kırk sene müddet zarfında kesb ve tahsîli resm-i âdî olan merâtib-i ilmiyyeyi tafarât-ı nizâmiyye ile bilâ-mâniʿ ve âik katʿ etmesi fukarâ-yı tarîkin inkisârına ve bu makūle nevâib-i kevniye ve varatât-ı zamâniyyeye giriftâr olmasına sebeb gayr-i mechûl olduğundan gayri çârtāk-ı iltifât-ı mülûkâneden sâkıt olanların bi-takdîri'l-lâhi teʿâlâ umûrları yevmen fe-yevmen ber-aks ve tâliʿ-i mesʿûdları nahs olageldiği dahi mücerrebân-ı ahvâl-i rûzgâra azhar mine'ş-şemsdir.