İşbu şehr-i Recebin onbirinci isneyn gecesi Galata'da harîk zuhûr edüp itfâsıyçün bilcümle ocaklu tahaşşüd ve mahall be-mahall tulumbalar ile teskîn-i nâre takayyüd eyledikleri esnâda sadrıazam hazretleri kemâl-i gayret ve ikdâmlarından nâşî âteşe karîb bir hâne-i mütezelzilü'l-erkânın tabaka-i ulyâsına suʿûd ve her şahsa bezl-i nukūd-ı nâ-maʿdûd eyler iken izdihâm-ı nâse adem-i tahammül ile hâne-i mezkûre münhedim ve tabaka-i süfelâsında bulunan vâfir kimesne mecrûh ve münʿadim olduğundan başka sadrıazam hazretlerinin dahi mahall-i mezkûrdan suḳūtları vücûd-ı âsafânelerine hadşe-resân olup baʿzı uzûvları âzürde ve vikāye-i hayrü'l-hâfızîn ile zarar-ı (262-b) küllîden mahfûz ve âsûde oldular. Bostancı-başı dahi bu musîbetden hisse-yâb ve renciş-i vücûd ile dil-teng-i ıztırâb olup âteş-i cevvâle dahi üç sâʿat kadar mümtedd oldukdan sonra mededkârî-i reşâşe-i sehâb-ı fazl-ı Bârî ile muntafî ve sâkin ve ol-havâlide bulunan fukarâ ve zuʿafâ bu beliyye-i sâriyeden sâlim ve amîn oldular.