Garb ocaklariyle Venediklü beyninde bundan akdem tekevvün eden mücâdele ve nizâʿ mahall be-mahall istimâʿ olunduğuna binâen Ülgün-Bar kapudanlarından Alî Reis nâm kimesne dahi vâkıf-ı keyfiyyet öteden berü müntehiz-i fırsat olup ol tarafda Trablus-Garb ocaklarına i'ânet etdikde Devlet-i aliyye ile el-yevm musâlaha üzere olan Venediklü'nün dahi sefînelerine îsâl-i hasâret eylemeleriyle sevâhil-i islâmiyyede levâzımını tertîb ve Antal- ya câniblerinde Venediklü'nün tüccâr sefînelerinden birine tesadüf edüp derhâl bünyân-ı silm-i muzâfâtı tahrîb ve sefîne-i merkümeyi taʿkîb ederek ahz eylediğinden gayri derûn-ı sefînede olan emvâli nehb ü gāret ve hareket-i fazîʿası münteşir olmamak içün derûn-ı sefînede bulunan Venediklü'yü ve sefîneyi gark eylediği mesmûʿ ve müste'min tâifesinin sefînelerine eyyâm-ı muhâdenede taʿarruz vukūʿ ve bu makūle mutaʿarrızların icrâ-yı zecrleri emr-i meşrûʿ olduğuna binâen derhâl Kapudan-ı Deryâ Vezîr Gāzî Hasan Paşa tarafından merkūmun ahz ve mukayyeden Âsitâne'ye îsâliyçün Dâmân kapudan taʿyîn ve merkūm Ali Reis Devlet-i aliyye tarafından üzerine sefîne ile bir kapudan me'mûr olduğunu hiss eyledikde pâ-fişürde-i mecâl-i sebât ve temkîn olarak firâr ve müsâʿade-i rûzgâr ile mersâ-yı Tunus'a vazʿ-ı lenger-i istikrâr ve Dâmân kapudan emr-i taʿkîbde eğerçi sarf-ı [tâb] ü tevân edüp ancak miyânelerinde olan buʿd mesâfe adem-i lühûka illet ve firârî-i mezkûre bâʿis-i selâmet olup pençe-i ukābdan halâs bulmuş saʿve-i zelîl gibi Tunus murâbıtına dâhil düşüp dehâlet ve istîmânı hasebiyle ocaklar tarafından yalnız bekā-yı nefsi şefâʿat olunmağla râkib olduğu bergandisi Dâmân kapudana teslîm ve mersâ-yı Tersâne-i âmire'ye vusûl ile lâzıme-i siyâset tetmîm olundu.