Doksandokuz tevcîhâtından tütün gümrükcüsü Mehmed Emin Ağa başbâkî kulluğu mansıbını istid'â edüp hücûm-ı zuʿafâ-yi ricâl mülâbesesiyle husûl-i matlabı müte'assir olup uhdesinde olan hidemât-ı nâfi'a ile iktifâ etmesi hususu baʿzı hayır-hâhân-ı devlet taraflarından gûş-i hûşuna ilkā olundukda beyne'n-nâs kader-i müşterek bulunan hubb-ı câh ve riyâsetden fâriğ olamayup bu dâ-i asîrü'd-devânın ilâcını şerbet-i dînâra (261-b) havâle ve mansıb-ı mezkûr tarafına tevcîh olunduğu takdirde câize-i mu'ayyeneden başka taraf-ı mîrîye yedi bin beş yüz guruş edâsını mukāvele etmekle husûl-i nef-i mîrî bâ'is-i teysîr-i mâfi'z-zamîri olup ber-vech-i muharrer sene-i mezkûre tevcîhâtında mansıb-ı mezkûr muvakkaten mûmâ-ileyhe tevcîh olunup müteʿahhid olduğu meblağ Hazîne-i âmire'ye teslîm etdirilmişidi. Mansıb-ı mezkûrun zamân-ı zabtı evâil-i Receb-i şerîfde olup mecî-i vakt takrîbiyle bir-iki gün mukaddemce zabt-ı mansıbı istîzân etdikde mir'ât-ı ümîdinde sûret-i müsaʿade cilveger ve zabtı günü alâ-mâcera'l-âde defterdâr efendiye rehber olup hazîneye îsâl akabinde Babıâlî'den da'vet ve kethüdâ bey tarafından ma'zûliyyeti ifâde ve başbâkî kulluğu sâbıkā mutasarrıfı olan Halîl Ağa'ya ibkā ve i'âde olundu. Devlet-i ebed-müddetde tabi'at ve isti'dâd-ı mahz ile kesb olunan merâtib erbâbına müstelzim-i envâʿ-ı fevâid ve me'ârib olup esbâb-ı ma'lûme ve berâtîl-i mektûme ile tahsîl-i menâsıba nakdîne nisâr-ı ihtimâm olanların ehliyyet ve istihkākları mütehakikü's-sübût olsa dahi semere-i mansıblarını müşâhededen âyis ve mahrum olacakları hezâr-bâr tecrübet-güzâr-ı ashâb-ı ihtiyârdır.