Rumeli kazaskeri olan Mehmed Sâdık Efendi birkaç mâhdan berü bîmâr ve işbu şehr-i mezkûrun ondördüncü hamîs gecesi esb-i cûbîn-pâye suvâr ve azm-i dârü'l-karâr edüp münhal olan sadâret-i Rumeli ile Anadolu kazaskeri olan Mehmed Mekkî Efendi mükerrem ve sadâret-i Anadolu ile bi-hasebi't-tarîk birâder-zâde Yakūb Efendi nâ'il-i sürûr-ı etemm oldu. Tercüme: Efendi-i müşârün-ileyh bin yüz otuz senesi Rebîül-âhirinin ondördüncü günü imâm-ı sultânî Arab-zâde Abdurrahman Efendi merhûmun sulbinden pâ-nihâde-i medâric-i zuhûr olup elli târîhinde medrese ru'ûsuna nâ'il ve pederi vefâtından sonra mûsıle-i sahnında bulunup niyâbet ile geşt ü güzâra mâ'il olup Yenişehir ve Ankara'da niyâbeten bast-ı seccâde-i şerîʿat ve Eyyüb ve Üsküdâr ve Ahî Çelebi ve Mahmud Paşa'da dahi icrâ-yı lâzıme-i hükûmet edüp yetmiş beş târîhinde mevleviyetle bekâm ve İzmir kadılığiyle dâhil-i silk-i mevâlî-i ʿizâm olup seksenikide mısr-ı Kahire'ye hükûmet ile azîmet ve seksensekizde Mekke-i mükerreme pâyesiyle hâ'iz-i kıst-ı evfâ-yı meserret olmuşidi. Doksanbeşde İstanbul kadılığiyle manassa-nişîn-i taʿayyün ve iştihâr ve sekiz mâh mürûrunda azl olunup (258-b) zücâc-ı mizâcı seng-zede-i inhisâr olup doksansekizde sadâret-i Anadolu ile tatyîb ve müddeti hitâmında alâ-tarîki'n-nakl Rumeli sadâretiyle kenâr-ı nüsha-i ikbâli tezhîb olunup sekiz mâh mürûrunda terk-i cihân-ı bî-bakā ve azm-i dâr-ı ukbâ eyledi. Müşârün-ileyh ʿâlî-cenâb ve hâzır-cevâb dervîş-meşreb mütevâziʿ ve mü'eddeb bir zât olup mehâkimde çok zamân müstahdem olduğuna binâen muʿâmelât-ı nâse dâ'ir olan mesâ'il-i şerʿiyyenin ekserîsi yâd-dâştı olmağla sadâretinde vakāyiʿ kâtibine muhtâc olmayup hod-be-hod fasl-ı daʿvâ ve hasm-ı mevâdd-ı husemâya kādir ve tıbb ve nücûm gibi ulûm-ı cüz'iyyeye vukūfu zâhir idi.