Dârü'd-darb-ı âmire'de sarrâf olan Bedros nâm zımmî hâlik olan sarrâf İstefa'nın hizmetkârı olup îcâd-ı ebâtıl ve tezvîrde bî-adîl ve ihtirâʿ mekrûhiyle de sânî-i azâzîl olduğuna binâen hâlik-i mersûme takarrüb ve giderek umûr-ı darbhâneyi hod-be-hod rü'yete mükibb olduğundan gayri o hilâlde darbhâne emîni bulunan Sıdkı Mustafa Efendi merhûmu baʿzı evzâʿ-ı ebleh-firîb ile tahdîʿ ve müteveffâ-yı mûmâ-ileyh dahi kâr-güzârlığını baʿzı mahallere işâʿe ile dâire-i şöhretini tevsîʿ etmişidi. Bir müddet bu hâl-i keyd-me'âl ile iştigāl ve çok geçmeden bi'l-istiklâl darbhâne sarraflığını istihsâl edüp ümenâ ve sâir hademeyi birer takrîb ihâfe ve tarafına imâle ve anlar dahi cemîʿ seyyi'âtını ketm ile hakkında icrâ-yı hüsn-i muʿâmele ederler idi. Bu keyfiyyet ile (259-a) kuvve-i istidrâciyyesi yevmen fe-yevmen müşted ve vazîfesinden hâric baʿzı umûra itâle-i yed eylediğinden gayri sunûf-ı reʿâyânın benîn ü benâtına tasallut ile hetk-i perde-i ırz u nâmûs ve bu bâbda hevâsına muhâlif olanların âbâ ve akrabâsını birer vechile giriftâr-ı kayd u mihnet ve bûs eylediğine kanâʿat etmeyüp kuvvet-i mâliyye ve ıtmaʿ ile kāle gelmeyecek melʿanet ve habâseti icrâ ve bâ-husûs vâkıf olabildiği serâir-i Devlet-i aliyye'yi nâdân ve bedhâhlara ifşâ etdiği ve Tarabya'da olan yalısının verâsında müceddeden kilise binâ ve derûnunu asnâm ve âvizeler ile emlâ eylediği refte refte mesmûʿ-ı pâdişâh-ı dil-âgâh olmağla mücerred himâyet-i dîn-i mübîn ve irâhe-i aceze ve mesâkîn niyyet-i sâdıkasiyle mesfûrun izâlesine irâde-i kātıʿa-i mülûkâne taʿalluk edüp derhal ahz ü habsine hatt-ı hümâyûn-ı mehâbet-rîz sudûr ve hesâbını rü'yet içün defter emîni Hasan Efendi me'mûr olup ihdâs etdiği kilise dahi mübâşeret-i mehere-i bennâyân ile bir lahzada hâk ile yeksân ve şehr-i mezkûrun ondokuzuncu salı günü Dîvân-ı hümâyûn nihâyet bulduğu gibi ser-i menhûsu saray meydânında bürîde-i tıyg-ı berrân kılındı.