Dağıstan asâkirinin bundan akdem Tiflis Eyâletine hücûmları Tiflis hâniyle müttefik olan Moskovlu'ya münʿakis olup vukūʿât-ı mezkûreyi serhadlerde olan vulât-ı Devlet-i aliyye'nin müsâmaha (256-a) ve tahrîklerine haml ile Tiflis'e top ve asker tertîb eylediklerini bu defʿa Çıldır vâlisi tahrîr eylediğinden gayri Françe Devleti'nin Petreburk'da mukîm olan elçisinden der-i devlet-medârda mütemekkin olan elçisine bu hilâlde vürûd eden kâğıdda elçi-i mersûm Moskovlunun Tiflis'e top ve asker gönderdiklerini hiss edüp derhal baş vekîl ile mülâkāt ve Devlet-i aliyye ile musâlaha üzere iken Tiflis tarafına irsâl-i asâkir ve mühimmât lâ-mehâle mûcib-i muhârebe ve muʿâdât olacağını tezkîr ve keşf-i mâfi'z-zamîr eyledikde madde-i mezkûreyi baş vekîl elçi-i mersûmdan ihfâ ve ol makūle tertîbâtın adem-i sıhhatini îmâ edüp Françe Devleti öteden berü Devlet-i aliyye'nin hayırhâhı olmakdan nâşî Moskovlu bu makūle serâir-i hâllerini ve bâ-husûs devlet-i ebed-müddet hakkında izmâr etdikleri keyd ü melʿanetlerini Françaludan ketm eyleyecekleri zâhir olduğundan gayrı dâimâ izhâr-ı sanâyiʿ-i hiyel âdetleri ve ihfâr-ı ahd ü mîsâk muktezâ-yı cibiliyyetleri olup mekr ü keydlerinden adem-i gaflet ve vaktiyle iktizâ eden mahallere sevk-i asâkir ve nakl-i zehâir şerîta-i hazm ü ihtiyâta riʿâyet kabîlinden olmağla derhal Çıldır vâlîsine ve ol-havâlide olan aşâir ve kabâile ve bâ-husûs Erzurum vâlîsine evâmir-i aliyye isdâr ve Çıldır vâlîsi eyâlet-i mezkûreden dört bin mikdârı asker tertîb edüp hâzır ve âmâde bulunması emr ü fermân ve Erzurum vâlîsi dahi her an hareket-i aʿdâya nigerân olup memâlik-i mahrûse-i mülûkâneye tahattî vukūʿunda (256-b) Erzurum'dan hareket ve me'mûrların cümlesiyle muhâbere eyleyerek bi'l-ittifâk defʿ-i mazarrat-ı aʿdâya gayret eylemesi, tarafına sâdır olan emr-i âlîde zikr ü beyân olunduğundan gayrı Faş ve Batum kalʿalarını dahi muhâfaza muktezâ-yı vakt ü hâlden olup binâberîn hâlâ Kastamonu mütesellimi olan Altı-kulaç-zâde beş yüz nefer piyâde ile Batum kalʿasını muhâfazaya müteʿahhid olduğu hâlde avâtıf-ı aliyyeden mûmâ-ileyhe kapucu başılık ihsân olunacağı me'âlinde kapudan-ı deryâ Vezîr Gâzî Hasan Paşa hazretleri tarafından mûmâ-ileyhe hassaten tahrîrât gönderildiği ve Faş kalʿasını muhâfaza içün Trabzon havâlisinden beş yüz nefer piyâde techîz olunup lede'l-iktizâ asâkire verilmek içün bundan akdem cemʿ olunan zahîreden maʿadâ bu defʿa dahi bir mikdâr zahîre tertîb ve mecmaʿ-ı asâkir tesrîb ve ol havâlide vâkiʿ olan kılâʿ neferâtının bir senelik mevâcibleri nakd hükmünde olan Erzurum gümrüğü mâlinden ihâle ve neferât-ı mezkûrenin müzâyaka ve zarûretleri nevʿamâ refʿ ve izâle olundu.