Tersâne-i âmire emîni olan Bekir Paşa-zâde Atâullah Bey-efendi'nin dirâyet ve kemâli zâhir ve akl ü rüşdü müsellem-i erbâb-ı besâir olduğundan gayri müddet-i medîde mektûbculuk ve tezkerecilik gibi hidemât-ı hatîrede istihdâm olduğuna binâen dekāyık-ı hutūb-ı dîvâniyyeye gereği gibi vâkıf ve bâʿis-i tedennî-i kadr [ü] menzilet olan mekârih-i umûrdan dâimâ müstenkif ve mütecânif olup mahmûl-i dûş-i gayreti kılınan şu'ân-ı mütehâlifetü'l-esâlib-i Devlet-i aliyye'de sadâkat ve istikāmeti ke'ş-şems fî-râbiʿatü'n-nehâr bedîdâr ve cevdet-i karîha ve meleke-i râsihası mümeyyiz-i hüsn ü kubh-ı ahvâl ve âsâr olmağla bu makūle zevât-ı müteşahhısânın menâsıb-ı cesîme-i Devlet-i aliyye'de müstahdem olmaları bâʿis-i teshîl ve tehvîn-i masâlih-i ibâd ve mûcib-i füzûnî-i şevk-i erbâb-ı haysiyyet ve istiʿdâd olduğuna binâen şehr-i mezkûrun yirmibeşinci günü mîr-i mûmâ-ileyhe çavuş-başılık hilʿati iksâ ve pâye-i kadr ü rifʿati iʿlâ olunup münhal olan Tersâne-i âmire emâneti şehremîni (255-b) olan Mehmed Bey'e ve şehremâneti Kâmil Paşa-zâde Hakkı Mehmed Bey-efendi'ye tevcîh olunup Bostancı başı Hüseyin Ağa'nın dahi hilâf-ı rızâ baʿzı hareketi rû-nümâ olduğuna binâen yevm-i mezkûrda maʿzûl ve haseki ağa bostancı başılık ile nâ'il-i eʿazz-ı me'mûl oldu. Maʿzûl-i mûmâ-ileyh bostancı başılık gibi bir hizmet-i azîme-den munfasıl ve kurb-i pâdişâhîden zâ'il olup ahâd-ı nâs misillü merâtib-i Devlet-i aliyyeden âyis ve mahrûm olması mugâyir-i şîme-i mülûkâne olmakdan nâşî derhal mûmâ-ileyhe kapucu-başılık ihsân ve nihâl-i zâbil-i âmâli abyârî-i inâyet ile reyyân kılındı