Tarîk-i hüccâcda vâkiʿ Payas nâm mahalde bir müddetden berü refʿ-i râyet-i şakā ve züvvâr ve tüccârı mübtelâ-yı cevr ü ezâ eden Küçük Alioğlu dedikleri âsînin cezâ-yı mâ-yelîkı icrâ ve nokta-i şekk-i vücûdu sahîfe-i âlemden imhâ olunmak irâdeleriyle bundan akdem Adana ve Haleb taraflarından üzerlerine taʿyîn-i asker ve hasr-ı tazyîkine eğerçi saʿy-i evfer olunmuşidi. Ancak şakī-i merkūmun mütehassın olduğu mahalle varınca birkaç yerde saʿbü'l-mürûr suğûr olup asker-i nühûset-eseriyle mahfûz ve hücûm-ı ceyş-i pâdişâhîde itlâf-ı nüfûs gā'ileleri mahsûs ve melhûz olmakdan nâşî bahren Donanma-yı hümâyûn (254-b) sefînelerinden bir-iki sefîne taʿyîn ve berren dahi iki kol asker irsâliyle cevânib-i erbaʿası muhat kılınmak vükelâ-yı devlet taraflarından tahsîn olunmağla deryâ cenginde mâhir ve kapudanlar beyninde celâdet ile müştehir olan Dâmân kapudan râkib ola-geldiği sefînesiyle me'mûr ve maʿiyyetine bir kıtʿa bumye sefînesi dahi muzâf kılınup müstaʿînen bi'l-lâh şirâʿ-küşâ-yı savb-ı mezbûr olduğundan gayri Adana tarafından dahi havâlinin askeriyle bir vezîr taʿyîn olunmak lâzım geldiğine binâen Adana'da bir müddetden berü ikāmet üzere olan Azm-zâde vezîr Yusuf Paşa'ya işbu şehr-i mezkûrun yirmiikinci perşembe günü eyâlet-i mezkûre tevcîh ve sûret-i me'mûriyyeti sâdır olan emr-i âlîde tafsîl olunarak mutabassırâne hareket eylemesi tarafına tenbîh olundu. Adana Eyâleti terfîh-i ahvâl-i reʿâyâ kasdiyle mütesellime zabt etdirilüp beher sene ber-vech-i maktûʿ bir mikdâr meblağ Özi muhâfızı Vezîr Çerkes Hasan Paşa'ya verilmek husûsu bundan akdem sadr-ı sâbık tarafından re'y olunup ol vechile nizâmı verilmişidi. El-hâletü-hâzihi Adana kemâkân mansıb olarak Yusuf Paşa'ya tevcîh olunduğundan Özi muhâfızı zikr olunan menfaʿatden mahrûm ve bu hâl ile dâiresini bir vechile idâre edemeyeceği meczûm olduğundan gayri bu makūle serhad vüzerâsının terfîh-i hâlleri lâzım ve tehyi'e-i esbâb-ı taʿayyüşleri mühim olmağla binâberîn Özi muhâfızı müşârün-ileyhe dahi Yanya Sancağı ber-vech-i arpalık ihsân ve Eğriboz muhâfızı (255-a) Vezîr Silâhdâr Mustafa Paşa'ya bundan akdem Kandiye Eyâleti tevcîh olunmuşidi, gāile-i hareket ile mübtelâ-yı masârif olacağını bu defʿa îmâ ve ibkāsını bi-vâsıtatu'ş-şufaʿâ inhâ eylediğine binâen hakkında merhamet-i mülûkâne bedîdâr ve şehr-i mezkûrda kemâfi'l-evvel Eğriboz Sancağı ile karîn-i istibşâr olup Hanya muhâfızı sadr-ı esbak Silâhdâr Mehmed Paşa'ya dahi yevm-i mezkûrda Kandiye ve selefi Yazıcı-zâde Vezîr Mustafa Paşa'ya Hanya tevcîh olundu.