Dergâh-ı âlî kapucu başılarından Zahneli Hasan Ağa îrâd-ı kesîr ve mâl-ı vefîr ile şehîr olmakdan nâşî seraskerler tarafından teshîl-ı maslahat veyâhud celb-i menfa'at irâdeleriyle gâh ordu defterdarlığına ve gâh kılâ' ta'mîrine sevk olunduğunu tafattun ile giderek bir mahalle me'mûr ve garâmet-i mâliyye ve metâ'ib-i bedeniyye ile bî-huzûr olacağını cezm edüp hakkında dendân-ı tama'ı tîz edenlere gâlib olmak kasdiyle surre emânetine tâlib olmuşidi. Mûmâ-ileyhin istid'âsı himmet-i etrâf ile karîn-i incâh u is'âf olduğuna binâen kudûmiyçün tarafına haber-i meserret-eser irsâl ve vakıf-ı hâl olduğu gibi şedd-i ahmâl ü eskal edüp birkaç gün zarfında Âsitâne-i sa'âdet'e vâsıl ve işbu şehr-i Rebî'ül-âhir evâhirinde surre emâneti hil'atini telebbüs ile kusvâ-yı merâmına nâil oldu.