Ber-vech-i arpalık Köstendil sancağına mutasarrıf olup bu esnâda Fethülislâm muhâfazasına me'mûr olan Vezîr (246-a) Livadyalı Hasan Paşa'nın mürg-i şikeste-bâl rûhu rubûde-i ukāb-ı ecel olduğu haberi vâsıl-ı der-i devlet-medâr olup taraf-ı mîrîye ve sâir mahallere olan duyûn-ı kesîresi edâ olunmak irâdesiyle zabt-ı muhallefâtına ve Livadya ve İstefe'de vâki' emlâk ve akārının fürûhtuna başka başka mübâşirler ta'yîn olundu.