Şeyhülislâm olan Dürrî-zâde Mehmed Ârif Efendi hazretlerinin hasbe'l-iktizâ azilleri lâzım gelüp şehr-i mezkûrun onuncu Perşembe günü (245-b) müşârün-ileyh sadr-ı fetvâdan tenzîl ve Rumeli pâyesiyle sadr-ı Anadolu olup fıkıh ve usûlde Nu'mân-ı zamân ve ulûm-ı âliyede Râzî-i devrân olan Müftî-zâde Ahmed Efendi hazretleri câh-ı vâlâ-yi meşîhet-i islâmiyye ile tebcîl ve münhâl olan Anadolu sadâreti Anadolu pâyesiyle sâbıkā İstanbul kādısı Mekkî Mehmed Efendi hazretlerine tevcîh olunup manzûme-i ikbâlleri Rumeli sadâreti pâyesiyle dahi tezyîl ve İstanbul pâyesiyle hekimbâşı olan Hayrullah Efendi'nin arpalığından zuhûr eden şükât ve bâ-husûs Enderûn-ı hümâyûn halkı beyninde müştehir olan adem-i meymenet tatayyuru sâmi'a-res-i şehriyâr-ı sutûde-sıfât olduğuna binâen yevm-i mezkûrda mûmâ-ileyh dahi azl ve Gelibolu'ya iclâ ve müderrisîn-i kirâmdan Kürk-zâde Hasan Efendi'nin riyâset-i etıbbâ ünvâniyle kadr ü menzileti a'lâ olunup reisülküttâb-ı sâbık Feyzullah Efendi'nin an-asıl vesvese ve vehmi gālib olup bu sebeble ihtilât-ı nâsdan mücânebet ve tesettür ve tevakki ile hânesinde ikāmet eyler iken mûmâ-ileyhe ba'zı vaz'-ı nâ-bercâ isnâd ve iğrâ ve bi-hükmi men yesma' kül hakkında derkâr olan teveccüh ve meyl izâle ve ilgā olunup derhâl İstanköy cezîresine nefy ü tağrîb ve kudât-ı İstanbul'dan Birâderzâde Ya'kūb Efendi ve Tarsusî-zâde Mustafa Efendi ve hâlâ İstanbul kādısı ve nakībü'l-eşrâf olan Derviş Mehmed Efendi hazerâtı sadâret-i Anadolu pâyeleriyle tenşît ve tatrîb olundu.