Müşârün-ileyh bundan akdem iki defʿa Özi gibi bir maʿkıl-ı hatîre muhâfız olup hîn-i ikāmetinde tavâif-i askeriyye ile imtizâc ve ülfet ve kalʿa-i pâdişâhîyi mazarrat-ı aʿdâ-yı dînden vikāye ve himâyet eylediğinden gayrı vâlî olduğu sâir memâlikde dahi lâzıme-i iʿtidâl ve iktisâda râʿî ve defʿ-i mezâlim ü taʿaddiyâta sâʿî ve bâ-husûs salâh-ı hâl ve safvet-i bâli gayr-i mestûr ve hükkâm-ı örfün ehven ve aslahı olduğu beyne'l-enâm meşhûr olup bu mülâbese ile hayır-hâhân-ı devlet taraflarından câ-be-câ sadâret-i uzmâya sevk ve zamîr-i münîr-i hazret-i şehriyârîde (244-a) semâʿan hâsıl olan dâiye-i şevk ber-taraf-sâz-ı illet te'hîr ve avk olup Halîl Paşa'dan sonra mühr-i hümâyûn ile mükerreren adrâb ve etrâbının dâğ ber-dil hasret oldukları iltifât-ı mülûkāneye mazhariyyetle mübâhî ve hürrem olmuşidi. Müşârün-ileyh bir müddet Âsitâne-i saʿâdet'de ikāmet ile muʿazzamât-ı umûr-ı devletde istihdâm olunmamış olduğuna binâen kavânîn-i devlet ve kavāʿid-i saltanata vâkıf olmayup zamân-ı yesîrde tabâyiʿ-i muhtelife-i nâse kesb-i ıttılâʿ mümkin olmadığından umûr-ı vekâlet-i kübrâyı idârede âciz olacağını baʿzı erbâb-ı tedkīk tahkīk eylediklerinden gayrı sadâret-i uzmâya pâ-nihâde-i iʿtilâ olduğu günden azline dek cemîʿ nâs fî küll-i hîn ü ân azline müterakkıb ve nigerân ve kendüsü dahi şu'ûnât-ı mütegayyiretü'l-esâlîb-i devlet-i edeb-bünyânın memâlik-i sâirede vukūʿ bulan umûr-ı avâma kıyâs olunmayacağını derk ve izʿân ile dem-be-dem tekevvün eden ahvâl ve âsârın tesviye ve tanzîmine dermânde ve hayrân olup müddet-i sadâretinde min-gayr-i ʿamdin vâkiʿ olan aserât-ı tabîʿiyyesi baʿzı eʿâzım-ı hüddâm-ı bâb taraflarından setr ü ikāle ve zann ve iʿtikādında müstakīm add olunan ârâ-i muʿavvece ve sakīme semt-i râstiye imâle olunarak bu ana dek iʿmâl ve ale'l-husûs maʿarret-i cehl-i müfrit hasebiyle beyne'l-emîr ve'l-vezîr vâcibü'l-ihtifâ olan baʿzı sırr-ı mazmûnun ketm ve hıfzı mümkin olmayup bi-hasebi'l-lüzûm bî-vakt ü ibbân sudûr eden hutût-ı hümâyûna ittibâʿ makūlelerinin (244-b) vukūf-ı zarûrîleriye nice mehâzir-i mütenevviʿa tekevvün eyleyeceği nezd-i terd-i mülûkânede meczûm olduğundan fazla baʿzı erbâb-ı zevâhir lisânlarında şe'âmet-i kadem ile mezkûr ve adem-i dirâyet ve satvetini îkān ile vakt-i sadâretinde baʿzı erbâb-ı fiten ü şûr memâlik-i mahrûsede ser-ber-âverde-i zuhûr olduğuna binâen işbu Rebîʿül-evvelin yirmiüçüncü günü sadr-ı devletden azl olunup sebkat eden hizmetine riʿâyeten maʿlûm-ı hass u amm olan salâh u takvâsına hürmeten emvâl-i sâmete ve nâtıkasına taʿarruz olunmayup cümlesi taraf-ı hümâyûndan inʿâm ve ihsân ve Selânik mansıbı ve İsmâʿîl cânibi seraskerliğiyle dahi mesrûr ve şâd-mân kılınup kapudan-ı deryâ Vezîr Gāzî Hasan Paşa hazretleri bu defʿa dahi kā'im-makām nasb u taʿyîn ve bundan akdem zât-ı huceste-sıfatlarıyla memleket-i Mora tezyîn olunan Vezîr Yusuf Paşa hazretlerinin akl u fetânetleri mücerreb erbâb-ı idrâk ü yakîn ve rüşd ü reviyyetleri gıbta-fermâ-yı ukalâ-yı mütekaddimîn olduğundan gayrı Âsitâne-i saʿâdet'de tûl-i meks ü ikāmetle serâ'ir-i saltanat-ı aliyyeye vâkıf ve dânâ ve bâ-husûs cemîʿ erbâb-ı elbâb fark u temyîzinde arak-rîz-i acz ü ıztırâb oldukları nabz-ı muhtelifü'd-darabât devlet-i seniyyeye âşinâ bir vezîr-i Felâtun-ârâ olduğu nezd-i ferd-i mülûkânede zâhir ve hüveydâ olup berîd-i beşâret-i sadâret-i uzmâ alâ-cenâhü'l-istiʿcâl savb-ı vâlâlarına isrâ ve irsâl olundu.