Mûmâ-ileyhin umûr-ı dîvâniyyede vâkiʿ olan taksîrât-ı tabîʿiyyesi ve bâ-husûs tamaʿ u irtikāba dâ'ir baʿzı harekât-ı redîesi muhtebir-i ahvâl-i enâm olan şehriyâr-ı Dârâ-gulâma maʿlûm olmakdan nâşî işbu Saferül-hayrın altıncı pazar günü çavuş-başılıkdan azl olunup rikâb-ı hümâyûnda kapucular kethüdâsı olan Muhsin-zâde damâdı Said Bey çavuş-başı ve mirahor-ı sânî İzzet Paşa-zâde diğer Said Bey kapucular kethüdâsı ve Tekfûr dağı'nda fevt olan Şaban-zâde'nin muhallefâtına me'mûr olup Dergâh-ı âlî kapucubaşılarından olan Sakızlı Mehmed Ağa mirahor-ı sânî nasb olunup me'mûriyyeti hitâmına dek baş silâhşor Durak Paşa-zâde Said Bey'e vekâlet hilʿati ilbâs ve cemʿiyyet-i süʿedâ havâdisiyle işgāl-i avâmm-ı nâs kılındı. Çavuşbaşılık hizmeti mezlaka-i akdâm-ı ricâl-i devlet ve mihakk-ı ibâd-ı erbâb-ı istiʿdâd ve haysiyyet olup hizmet-i mezkûrede müstahdem olanların tabîʿatlerinde cevdet ve havsalalarında vüsʿat ehemm olduğu gibi şâ'ibe-i tamaʿ u hırsdan tahallüs ve izhâr-ı gınâ-yı tabʿ ile âzâde-i mekr-i erbâb-ı tecessüs ve tefahhus olmak dahi elzem olup maʿâz-Allah sevdâ-yı celb-i mâl ile hukūk-ı nâsı ibtāl (232-a) ve hasmının birini li-illetin istishâb ile nâr-ı gadr u zulmü iş'âl edenlerin hâne-i avâkıb-ı hâlleri vîrân ve bâ-husûs kizb ü istihzâyı âdet ve hile vü hud'ayı tabi'at edenlerin dünyâda hazz u nasîbleri hırmân ve rûz-i cezâda pâdâşları hüsrân olacağı zâhirdir.