Kudûmiyye nâmiyle Rumeli vâlîleri iki yüz elli kîse mikdârı meblâğ eyâlet-i mezkûreye tarh u taksîm ve bahâne-cû-yi celb ü nehb olan kudât ve aʿyân dahi bu sebeb-i mûcibü'l-gazab ile matlûbun mislini nefislerine tahsîs ve tanzîm ve bu tertîb-i acîb ile her vâlî Rumeli eyâletine müstevlî oldukda fukarâ-yi memleket ve kuttān-i vilâyet beşyüz kîse tecrîm olunduklarına binâen hâlleri tebâh ve dâmen-i refâh u ayşleri kûtâh olduğunu Muhsin-zâde merhûma Ordu-yi hümâyûn'da ba'zı hayırhâhlar ihbâr ve شر الامور محمد ثاتها mefhûmunca mutâbık olan kudûmiyye-i mezkûrenin menʿ ü refʿi mukābelesinde nasr-ı azîze dîde-küşâ-yi intizâr olmak hususları ihtâr olundukda (227-b) merhûm-ı müşârün-ileyh bu nasîhat-i nâfiʿayı bilâ-tereddüd mengûş-i gûş kabûl eyleyerek kudûmiyyenin def'iyle takayyüd ve hattâ o mevsimde Rumeli vâlîsi bulunan Müderris Osman Paşa izhâr-ı sûret-i dürüştî ve taʿannüd edüp zîr-i kelîm-i hafâdan nakd-gîrân-ı asra arz-ı hutām ve zulmiyye-i mezkûrenin bakā ve devâmını iltizâm etmişiken berü tarafda olan sebât ve tecellüd takrîbi ile sa'y ü ihtimâmı gayr-i müfîd ve zâhiren ve bâtınen vücûda gelen ameli ibtāl ve terdîd olunarak zikr olunan eser-i hayr-ı cedîd fi'le gelüp der-akab Silistre fütûhâtı gibi bir feth-i azîzü'l-misl ile isâbe-i müslimîn nâil-i sürûr-ı etemm ve zu'afâ-yi nâsdan izâle olunan zulm-i sarîhin zuhûr-ı hüsn-i mücâzâtı meşhûd-ı ahass u e'amm olup bi-ʻavnihi sübhânehu ve teʻâlâ bu maʿâdin-i muhdesenin refʿiyle dahi etrâf u eknâfda ser-ber-âverde-i bağy ü şakā olan zaleme ve cebâbirenin kesr-i savlet ve mazarratları ve bâ-husûs pîrâmen-güzâr-ı gülzâr-ı saltanat olan hâr-zâr-ı aʿdânın eşiʿa-i süyûf-ı müslimîn ile sûziş-pezîr-i inʿidâm ve izmihlâl olmaları eltâf-ı mesbûke-i ilâhiyyeye nazaran bir emr-i muntazarü'z-zuhûrdur.