Eyâlet-i Karaman'a mülhak Beyşehri sancağında Bozkır ve Niğde sancağında Bereketlü maʿdenleri birkaç sene mukaddem zuhûr edüp o mevsimde bulunan ricâl-i muztaribetü'l-ukûl kuvve-i vâhime-i mahza ile beyân-ı fevâ'id ve mahsûl eyleyerek iʿmâlini tervîc ve akıbet-bîn-i umûr u mevâdd olan zevât-ı vâzıhatü'l- (226-b) istiʿdâdın gālibiyyet-i mutlaka ile dâʿiye-i şevk-i zarûrîlerin tehyîc akabinde teshîlen li'l-maslaha civârda vâkiʿ baʿzı nemâlı tîmâr ve evkāf karyeleri zikr olunan maʿdenlere ilhâk ve rabt ve birer emîn nasbı ile hâsılât-ı cüz'iyyesi ahz ü zabt olunur idi. Ancak bu takrîb-i dil-firîb ile fukarâ ve zuʿafâ mübtelâ-yı tekâlîf-i mâ-lâ-yutāk ve zebûn-ı ser-pençe-i kahr u meşâk olduklarından gayrı der-heme-evkāt akvât-ı nâsa medâr olan hirfet-i dihkānet ve mekâsib-i zirāʿatden bi-zarûre ferâgat ve evlâd ü ıyâlleriyle maʿden umûrunu rü'yet ve bu külfet-i gayr-i me'lûfe ile hayâtlarından me'yûs ve birkaç defʿa kendülerinden âsâr-ı isyân dahi mahsûs olduğundan başka erbâb-ı tîmârın ber-vech-i muharrer dâhil-i icmâlleri olan baʿzı melhûzü'n-nemâ karyelerinin maʿdenlere irtibâtiyle mahsûllerine naks u kıllet târî ve bi'l-iktizâ bir mahalle me'mûriyyetleri irâde olundukda iddiʿâ-yi kesr ü fıkdân îrâd ve her birinin pâ-bend-i azîmet ve iktidârı olduğu ve kezâlik baʿzı evkāfdan ifrâd ve zamm olunan kurânın hâsılâtı eyâdî-i murtezikaya resîde olmadığından fî-küll-i evkāt ve ahyân nâlân u giryân ve hizmetlerini terk ile fi'l-cümle ma'mûretü'l-etrâf olan evkāf gāmir ve vîrân olup menâfî-i kalîle zımnında mazarrat-ı külliyye ihtiyârî kānûn zabt-ı şevârid-i mülkiyyeye gayr-i evfak ve zîr-destân ve zu'afâyı bu rütbelerde izʿâc müstelzim-i gazab-ı Hakk olduğundan fazla hakîkat-i maddeye nazar olunsa reʿâyânın bu misillü esbâb-ı mûcibü'l-ıztırâb ile giriftâr-ı kayd-ı mazarr olması hazîneye âid ve ba'zen taleb-i kesb ü nef'-i zâid intikās-ı (227-a) sermâye-i sevdâgerâne mûcib olduğu dahi ma'lûm-ı muhteberân-ı hâl gāib ve şâhid olmağla rahmen-li'l-ibâd ve defʿan-li'l-fesâd zikr olunan ma'denlerin refʿ ü ibtâliyle fukarâ tervîc belki âmme-i nâs tenşît ve tefrîh olunmak husûsu taraf-ı hazret-i sadrü's-südûrdan hâkipâ-yi kimyâsâ-yi mülûkâneye arz ve telhîs ve an-asıl bu makūle mazarrat ve hasâretin vukūʿiyle cihet-i taʿayyüş-i nâs tenkīs olunmak menfûr-ı tabʿ-ı hüsrevâne ve hilâf-ı rızâ-yi pâdişâhâne olmakdan nâşî fî-mâ-ba'd zikr olunan ma'denlerin refʿiyle vedi'a-i hazret-i Bârî olan zuʿafâ metâ'ib ve tekâlîf-i şakkadan tahlîs olunmak bâbında kat'iyyü'l-medlûl hatt-ı hümâyûn şeref-rîz-i sudûr olup mûcibince iktizâ edenlere evâmir-i aliyye ısdâriyle kurâ-yi mağzûbe-i mezkûre intizām ve kemâkân mutasarrıflarına i'âde ve ircâ olundu.