Talebe-i ulûmdan nâ'il-i mülâzemet olanların müddet-i muʿayyeneleri tamâm ve bâ-husûs radde-i hâricde müderrisîn-i kirâm vâreste-i kayd-ı kesret ve izdihâm olmakdan nâşî imtihâna müstaʿidd olanların derece-i istiʿdâdları tecrübe ve tenkîb ve muvaffak olanları radde-i mezkûreye vazʿ u idhâl ile merâtib-i ilmiyyeyi tesviye ve tertîb irâdesiyle ihbâr-ı imtihân iʿlân ve îzân ve işbu Muharremü'l-harâm evâ'ilinde talebe-i ulûm Bâb-ı fetvâ-penâhî'ye kudûm edüp taʿyîn-i mekân ve Mutavvel'in fenn-i sânîsi ibtidâsından imtihân olunacakları beyân olunup taʿyîn olunan mahalli hall iddiʿâsında olanlar ferden ferdâ mümeyyizler huzûruna duhûl ve tertîb ve tehyi'e olunan es'ilenin küllîsine cevâb veren aʿlâ iʿtibâriyle tahsîl-i me'mûl edüp es'ile-i mezkûreden fakat bir-iki su'âlin cevâbını tedârük edemeyüp kusûruna cevâb-ı müskit verenlere karîb-i aʿlâ ve nısfından ziyâdesine zafer bulanlara vasat-ı kavî ve mâ-dûnuna muvaffak olanlara vasat-ı ıtlâk olunarak altmışdan ziyâde mülâzim hâric ru'suna neyl ile ricâl-i tarîka müşârik ve müsâhim oldular.