Çünki hâlik-i bî-misl ü mânend ve hüdâvend-i bî-hîş ü peyvendin gümgeştegân-ı bâdiye-i acz ü taksîr ve gavta-hârân-ı deryâ-yı tasarruf ve tedbîr haklarında bi-hasbi'l-istiʿdâd ve'l-kābiliyye taʿayyün eden niʿam ve âlâ ve kerem-i bî-intihâsı müstedʿî-i hamd ü senâ ve müstelzim-i sitâyiş-i zât-ı aʿlâsıdır. Lâ-cerem münharit-i silk-i mieteyn ve elf olan işbu sene-i amîmetü'l-meymenenin âyât-ı furkāniyyeden اَلْحَمْدُ لِلّٰهِ رَبِّ الْعَالَمِينَ الرَّحْمٰنِ الرَّحِيمِ âyetleri adedine tetâbuku mûcib-i hamd ü senâ-yı ferâvân ve bâʿis-i dürûd u şükr-i bî-pâyân olur. Gûna-gûn niʿâm-ı hâlik-ı bî-çûn bürûzuna delâlet eyleyeceğinden gayri zahareddin terkîbinin bi-hasbi'l-kemmiyye târîh-i sâl-i cedîd ile tevâfuku serkeştegân-ı vâdî-i bagy ü dalâlet ve tîre-dilân-ı gavâyet ve ruʿûnet olan ehl-i küfr ü mefsedeti pâdişâh-ı asr razekahu Allah el-fetha ve'l-nasra hazretleri kuvvet-i batş-ı mülûkâne ve nîrû-yı himmet-i hüsrevâne ile kahr ü tezlîl edeceğine işâret-i gaybiyye ve lâyiha-i lâ-reybiyye olduğu rûşen-güherân-ı enâm ve serîre-şinâsân-ı eyyâma zâhirdir. Li-muharririhi: Tiyg-ı islâm ile bi-avni'l-lâh Katʿ olur şâh-ı düşmenin bîhî Bu nevîn-sâl-i ferrûhun zîrâ Zahareddin geldi târîhi