Bin yüz doksanaltı senesi şevvâlinin onikinci cumʿa günü sulb-i pâkîze-i hazret-i tâcdârîden kımât-ârâ-yı vücûd olan Şehzâde Sultan Mehmed Nusret hazretleri bu esnâda illet-i cederîden ser-nihâde-i bâlîn-i bîmârî olup illet-i mezkûreden bi-emri'l-lâhi teʿâlâ ifâkat bulmadığına binâen işbu şehr-i Zilhiccenin ondokuzuncu sebt günü mürg-i rûh-ı bâhirü'l-fütûhu sûy-i dil-cû-yı behişt-i berîne tayerân eyledi. Cenâb-ı Hakk bâkīlerini nâ'il-i ömr-i tavîl ve nice zamân zuhûr-ı nesl-i şâhâne ile aʿyûn-ı nâsı karîr eyleye, âmîn. Şehzâde-i müşârün-ileyh hazretlerinin fevtine abd-i âcizin irticâlen dediği târîh-i tâmdır. Dirîgā bakāsız cihândan gidüp Bu gün bir civân-ı musaffâ-sirişt Dedi fevt-i sâlin vakāyiʿ-nüvis Olup dâr-ı sultân Muhammed-behişt (226-a)