Birkaç sene mütemâdî olan seferler takrîbi ile Devlet-i aliyye'nin îrâdı masrafına galebe eylediğinden gayri li-ecli'l-ihtiyât sugür u hudûda taʿyîn olunan seraskerlerin masârifâtı ve aʿdânın Akdeniz ve Karadeniz'de el-yevm mevcûd olan donanmasına mukābeleten ve donanma tertîbi fikri baʿzı tasarrufât-ı akliyye ile hâricden bir mikdâr mebâliğ tedârüküne Devlet-i aliyye'yi ilcâ edüp mukaddemâ vâkiʿ olan meşveretlerde Aydın muhassıllığı ber-vech-i eshâm tâliblerine fürûht olunup hâsıl olan mebâliği bir mahalde hıfz ve lede'l-lüzûm umûr-ı donanmaya sarf olunmak husûsu eğerçi karârdâde-i ashâb-ı ârâ olmuşidi. Ancak Aydın sancağının etrâf ve eknâfında mütegallibe-i nâsdan (224-b) katı çok eşhâs-ı kāsiretü'l-ukūl mevcûd olup velev min-baʿd memleket-i mezkûrenin vâlî-i kāsir ve mutasallıtdan hulüvvü o makūlelerin tuğyân ve fesâdlarına sebeb olacağı ihtimâliyle re'y-i mezkûrdan udûl ve sadrıazamlara hass kayd olunan İzmir ve Kıbrıs hâsılâtı gayr-ez-mîrî eshâm iʿtibâriyle beyʿ ü fürûht olunup Aydın muhassıllığı kezâlik gayr-i İzmir'i Kıbrıs'a ve Yenişehir cizyesi câ'izesi İzmir'e bedel olmak üzere sadrıazamlara müceddeden has taʿyîn olunmak savâb-dîd-i vükelâ-yı devlet olduğuna binâen lede'l-istîzân şeref-yâfte-i sudûr olan hatt-ı hümâyûn mûcibince Kıbrıs yüz yirmi yedi buçuk ve İzmir elli üç buçuk sehm iʿtibâr olunup nizâm bulan şurûtu derciyle kā'imeler tahrîr ve tâliblerine arz u fürûht ve cümlesinden hâsıl olan dört bin yedi yüz altı kise lede'l-iktizâ umûr-ı donanmaya sarf olunmak üzere alâ-tarîki'l-vediʿa Darbhâne-i âmire'de hıfz olundu.