Mûmâ-ileyh beş-on gün kadar illet-i mesâneden zahmet-keş ve îd-i adhâ günü müddet-i ömrünü itmâm ile menzil-i ukbâya raht-keş olup der-ân sâʿat techîz ve tekfîn ve mezâr-ı pür-envâr Süleymaniye'de tedfîn olundu. Münhal olan câh-ı tevkîʿî muvakkaten defter emîni olan Feyzi Süleyman Efendi'ye ve defter amâneti ber-vech-i tencîz Hasan Efendi'ye ve baş muhâsebe Rifat Ahmed Bey'e ve Anadolu muhâsebesi sâbıkā büyük tezkereci Enverî Sadullah Efendi'ye muvakkaten tevcîh olundu. (225-a) Tercüme: Müteveffâ-yi mûmâ-ileyh bin yüz otuz bir târîhinde Vezîr Koca Bekir Paşa merhûmun sulbinden gehvâre-i zîb-i vücûd ve gün be gün neşv ü nemâ kesb ederek fâsıl-ı mâ-beyn-ı maʿdûm ve mevcûd oldukda tahsîl-i maʿârife bezl-i cehd ü tâkat ve bin yüz elli üç târîhinde küçük evkāf muhâsebeciliğini tahsîl ile ihrâz-ı evvelîn pâye-i izz ü rifʿat edüp temâdî-i vakt ü zamân takrîbi ile katı çok menâsıba tasarruf ve aded-i sinni sebʿîne mütenâhiz iken çavuş-başılık hizmetiyle teşerrüf ve an-asıl silisü'l-bevl illetiyle derd-nâk iken Dîvân-ı hümâyûn'da hasebü'l-iktizâ vukūʿ bulan tûl-i meks ü tevakkuf iktizâsıyle madde-i ihsâs eczâ-yı reşâşiyeyi mütehaccir etmekle illeti illet-i mesâneye mütebeddil olup bu tevcîhâtda eğerçi çavuş başlılıkdan maʿzûl ve rûz-nâmçe-i evvel ve baʿdehû nişancılık mansıbına mevsûl olmışidi. Ancak esbâba nazar ile vücûduna ârız olan hareket-i kısrî ve vazʿ-ı gayr-i tabiʿî erkân-ı vücûdunu mütezelzil ve minvâl-i muharrer üzere îd-i adhâ günü tebdîl-i makām ve menzil ve civâr-ı rahmet gâfirü'z-zünûbu melâz ve mev'il eyledi. Müteveffâ-yi mûmâ-ileyh halîm ve selîm sâdık ve müstakîm sâhib-i meskenet ve vakar-ı mutasallib ve dîndâr olduğundan gayri nâmûs-ı devleti sıyânet âdeti ve mekkâre-i umûra adem-i tasaddî medâr-ı mefhareti olup tekdîr-i kulûb-i nâsdan hârib ve her şahs-ı teng-havsalayı zebân-ı kand-rîziyle tarafına câzib ve câlib idi.