Mekke-i mükerreme kadısı Mehmed Paşa imâmı Esseyyid Ali Efendi'nin Şam-ı şerîfde vefât etdiği haberi Âsitâne-i saʿâdet'e vusûl ve kazâ-i mezkûr mahlûl olduğuna binâen sâbıkā Mısır kādısı olan Samânî-zâde Ömer Hulûsî Efendi'ye işbu Zilka'detüş-şerîfenin üçüncü günü şurût-ı mukarreressiyle müddet-i mahlûle tevcîh ve sâbıkā Edirne kādısı olan Feyzullah Efendi-zâde Mehmed Refîʿ Efendi'nin bi-hasebi't-taʿalluk derece-i kadr ü iʿtibârı terfîʿ ve tenvîh olunmak çokdan berü cây-gîr-i zamîr olduğuna binâen yevm-i mezkûrda bâ-işâret-i aliyye efendi-i mûmâ-ileyhe ve Başmakcı-zâde Esseyyid Mehmed Selim Efendi'ye Mekke pâyeleri inâyet olundu.