Şeyhülislâm-ı esbak İbrâhim Bey-efendi hazretlerinin Âsitâne-i saʿâdet'de etbâʿ ve levâhik ve akrabâ ve müteʿallikleri mütekessir ve câh-ı fetvâdan infisâlleri hasebiyle havâşîsinin dil-bend-i ümîd oldukları menâfiʿ ve ağrâza vusûlleri mümteniʿ olduğundan mütazaccir ve mütekeddir oldukları ve bu infi'âl ile mahall be-mahall mesâvî-i devlete mübâşeret ve avamm-ı nâsa ser-rişte-i kāl u kīl olacak erâcîfin hudûsuna illet olduklarından fazla müşârün-ileyh hazretleri dahi kibr-i nefs ve ulüvv-i himmet ile ma'rûf olup erbâb-ı ihtiyât ve ikbâl-perestlerden tesettür ve ihtilât-ı züvvâra olan muhâtarayı adem-i tefekkür ile lisân-ı sârımü'l-beyânları ba'zen kabûl-i taʿassür eylediğine binâen Âsitâne'den tenahhî ve tegarrübleri iktizâ ve mâh-ı mezkû- run dokuzuncu çarşamba günü arpalıkları olan Engürüye'ye nefy ü iclâ olundu. Müşârün-ileyhin müddet-i meşîhat-i sâmiyeleri seksenüç gün olup (222-b) baʿde'l-azl tamâmca seksenüç gün ikâmetlerinden sonra nefy ü iclâları vukūʿu ittifâkiyyât-ı garîbedendir. Mahdûmları Mustafa Bey-efendi cenâblarının dahi bir zamân gûşe-gîr-i inzivâ olmaları iktizâ eylediğine binâen İncir köyünde îcâr ile sâkin oldukları sâhilhânede bast-ı kalîçe-i ikâmet ve nâs ile ihtilât ve muʿâşeretden dâmen-keş-i rağbet olmaları irâde buyuruldu. Ve Dergâh-ı âlî kapucu başılarından Karahisârî Ahmed Bey dahi bir merd-i derîde-zebân ve jajhâ-yi deverân olup tekebbür ve taʿazzumu fevka'l-hadd ve miyân-bend-i iştihârı olan dirâz ile kendüyü akl u nühâ erbâbından add eylediğinden gayri bu âna dek istihdâm olunduğu hidemâtda tevfîk-i hakdan âyis ve mahrûm ve kibr ü nahveti sebebi ile beyne'n-nâs medhûr ve mezmûm olup fassâl ve hettâk-i mihzâr-ı bî-bâk olduğuna binâen eyyâm-ı sâlifede birkaç defʿa vâkiʿ olduğu gibi bu defʿa dahi Âsitâne'den tard u tebʿîdi lâzım gelüp yevm-i mezkûrda maskat-ı re'si olan Karahisâr'a nefy ü tağrîb ve silâhşorân-ı hassadan Sârbân Ali Ağa leyl ü nehâr büyût-ı nâsı geşt ü güzâr ve ricâl ü kibâr-ı devleti fasl u mezemmete ibtidâr ve nefsini Kahramân-ı sânî hisbâniyle hakkında Devlet-i aliyye'nin kusûr-ı iltifâtını tezkâr ve endâmından bahtına sirâyet eden tîregî ve zulmetden her bâr şekvâ ve dâimâ, أضاعونی و أی فنی أضاعوا لـیوم کـریهة ve sedâd-ı sağr-ı zemzemesiyle usûl-i bend-i dâire-i istiğnâ ve oldukça sâye-i Devlet-i aliyye'de müteʿayyiş olup ebnâ-yi cinsine nazar ile (223-a) hâline şükr etmek ahrâ iken pâ-keşîde-i vâdî-i kanaʿat ve hasm-ı kaviyy-i ehl-i tenaʿum ve refâhiyyet olmağla bunun dahi gûşmâl ve te'dîbi mühimm olduğundan der-akab ahz ve Sakız cezîresine iclâ olundu.