Sâbıkā kul kethüdâsı olup bir müddetden berü Özi ağası olan Sivaslı Mehmed Ağa'nın harekât ve sekenâtı makbûl ve lede'l-istihdâm tarafından sadâkat ve istikāmet-i bürûzu melhûz ve me'mûl olduğu bundan akdem taraf-ı sadr-ı azamîden mübârek-rikâb-ı kâmyâb-ı hüsrevâneye arz u inhâ ve ağalık içün Âsitâne'ye celb olunması istid'âsına müsâʿade-i hümâyûn rû-nümâ ve hufyeten der-i devlet-medâra gelmesiyçün Özi'ye âdem isrâ (222-a) olunmuşidi. Ağa-yi mûmâ-ileyh mâh-ı mezkûrun yedinci pazartesi gecesi Âsitâne'ye vâsıl ve sırren sarây-i âsafîye dâhil olup ale's-seher tasmîm olunduğu vech üzere yeniçeri ağalığı mûmâ-ileyhe tevcîh ve ihsân ve selefi Ahmed Ağa'dan dahi bu âna dek hilâf-ı rızâ bir vaz' u hareket sâdır olmadığından mazhar-ı lûtf-ı şehriyâr-ı gîtî-sitân olup yevm-i mezkûrda rütbe-i vâlâ-yi vezâretle Hotin muhâfızlığı müşârün-ileyhe tevcîh ve inâyet buyuruldu.