Birkaç mâhdan berü sadâret-i uzmâ kethüdâlığiyle nâ'il-i izz ü şeref olan Ahmed Nazîf Efendi hazretlerinin bu âna dek müstahdem oldukları hidemâtın cümlesinde şâyân-ı sitâyiş olan sıfât ile ittisâfları ve medhûliyete bâ'is olan harekâtdan istinkâfları kābil-i inkâr olmadığından gayri tarafından şahs-ı vâhid mutazarrır ve vaz' u reftârından bir ferd mütekeddir olmayup bây u gedâya mu'âmele bi'l-mücâmele ve bâ-husûs rü'yet-i umûr-ı devletde leyl ü nehâr terk-i müsâmaha ve müsâhele etmişiken mücerred lâzım-ı mâhiyyet-i eşhâs olan buğz u hasedden nâşî ba'zı nâs müşârün-ileyhin hakkında isnâd-ı mâ-lem-yekün ile lâzime-i bed-hâstî ve rişkî izhâr ve mânî ve mu'tî-i mutlakın mevhibesi olan ni'am ve tereffühü istiknâr eyledikleri ma'lûm-ı şehriyâr-ı cemîlü'l-âsâr olduğuna binâen gars-ı yemîn-i devletleri olan müşârün-ileyhi isâbet-i ayni'l-kemâlden sıyânet ve bir müddet hânesinde istirâhat ile du'â-yı devâm-ı ömr ü devletlerine muvâzibet etmeleri irâdesiyle işbu mâh-ı Zi'l-kadenin altıncı pazar günü kethüdâlıkdan azl olunup hizmet-i mezkûrede kemâkân bir sâhib-i ta'ayyün ve vücûdun eşedd-i lüzûmu olduğuna binâen hâlâ mîrahor-ı evvel olup sadr-ı esbak Devâtdâr Mehmed Paşa (221-b) merhûmun necl-i necâbet-perveri Abdî Bey hazretlerinin rüşd ü reviyyetleri mahsûs ve bâ-husûs bir-iki seneden berü müstahdem oldukları büyük mîrahorlukda cüz'î ve küllî bir vaz'-ı nâ-ber-câ ile mevzû'-ı bahs-ı nâs olmadıkları ma'lûm-ı şehriyâr-ı kerâmet-menûs olduğuna binâen yevm-i mezkûrda müntehâ-yı menâsıb-ı ricâl-i devlet olan sadâret-i uzmâ kethüdâlığiyle müşârün-ileyh hazretleri tevkîr ve çavuş-başı Essey- yid Mehmed Hayri Efendi'nin dahi tersâne emîni olması bir zamândan berü cây-gîr-i damîr olup yevm-i mezkûrda Elhâc Selim Ağa yerine tersâne emîni nasb olunup çavuş-başılık hizmeti dahi Lâleli Mustafa Efendi'ye tevcîh ve tezkire-i evvel Enverî Efendi'nin ba'zı hareketinden sadrıazam hazretleri mahzûz olmayup azlini irâde buyururlar idi. Ol dahi bu esnâda ma'zûl ve sâbıkā cizye muhâsebecisi Mehmed Nahifî Efendi sâniyen büyük tezkirecilik ile nâil-i e'azz-ı me'mûl oldu.