Bundan akdem sebeb-i maʿlûm ile kâr-sâzân-ı devlet-i ebed-bünyâna itâle-i lisân ve hirmen-i râhat u âsâyişine hod-be-hod şerâre-feşân olup Âsitâne'den tard u tecnîb ve evlâd ü iyâliyle Mudanya'ya nefy ü tağrîb olunan Mudanyalı-zâde'nin semâhatlû şeyhülislâm efendi hazretlerine kıdem-i taʿalluku olmakdan nâşî karîb ü baʿîd manzûr u mashûbu ve bâ-husûs müderrisînden oğlu Mehmed Saʿîd Efendi müşârün-ileyhe mukaddemâ mektûbî olup bu esbâb ile kayd-ı nefîden ser-âzâd olması akdem-i matlûbu idi. Ber-muktezâ-yı tasârîf-i rûzgâr müşârün-ileyh hazretleri bu esnâda riyâset-i ilmiyye ve meşîhat-i islâmiyye ile hâiz-i rehîne-i (212-b) istibşâr oldukları gibi şeyh-i merkūmun ibkā-yı meşîhatiyle ıtlâkını bâ-telhîs niyâz eylediler şeyh-i merkūm nefy olunduğu hînde Hüdâyî tekyesi gavsü'l-vâsılîn ve senedü'l-ârifîn Dülger-zâde Efendi hazretlerine teklîf-i ʿanîf ile ihâle olunup bâtın u zâhirleri maʿmûr bahr-i vecd ve istiğrâka mağmûr bir zât-ı Bistâmî-şuʿûr olduklarına binâen tekyeden tahrîk ve izʿâcları mûcib-i inkisâr-ı derûnları olacağı mülâhazalariyle telhîs-i mezkûre taraf-ı zâhirü'ş-şeref-i mülûkâneden müsâʿade olunmayup te'hîri irâde olundukda ibtidâ takdîm etdiğimiz telhîsdir. Red ve adem-i isʿâfı bâ'is-i sukût-ı iʿtibâr u rağbet ve mûcib-i noksâniyyet-i hürmet ü izzetimizdir diyerek niyâzda ısrâr ve bi'l-âhire şeyh-i mezkûru ıtlâk etdirdüp tekyeyi dahi tevcîh ve der-akab tarafına âdem îsâl ve Âsitâne-i saʿâdet'e geldiği gibi müşârün-ileyh hazretleri büyük kavukluların birini Dülger-zâde Efendi'ye irsâl edüp Beşiktaş'da olan zâviyelerine rücûʿlarını tenbîh etdiklerinde şeyh-i mûmâ-ileyhin bir seneden berü infâs-ı kudsiyyesinden istifâza eden mürîdân ve dervişânın bu muvahhiş-i peyâmdan feryâd u figânları tanîn-endâz-ı kubbe-i gerdûn ve buʿd-ı sûrî vukūʿundan her biri dil-hûn ve mahzûn olup şeyh efendi dahi deryânın şiddet-i telâtumundan bahs ile ferden Beşiktaş'a mürûr eyleyeceklerini inbâ ve «bundan sonra bizi bir dahi bu tekyeye şeyh ederler, lâkin kabûl etmeyiz» kelâmını îmâ buyurduklarını meclisleriyle müşerref olan (213-a) kibâr-ı nâsdan baʿzı zevât nakl ü rivâyet ve ber-minvâl-i muharrer yevm-i mezkûrun ferdâsı karşuya mürûr ve azîmet ile zâviye-i kadîmelerine nûr-bahş-ı vusûl ve Mudanyalı-zâde dahi Hüdâyî tekyesine gelüp muʿâmele-i sâbıkası ile meşgûl oldu.