Rusyalu'nun müceddeden binâ etdikleri Hereson kalʿası pîşgâhında ve Kırım limanlarında kebîr ü sagīr otuz-kırk pâre sefîneleri ve Azak câniblerinde dahi beher hâl donanmaları olduğundan gayri Leh derûnunda Keyfo havâlisinde taburları olduğu mesmûʿ ve her sene Alikorne taraflarında eğerçi birkaç sefîneden müretteb donanmalarının karârı âdet gibi olup ancak bu esnâda bahr-i Baltık'dan onaltı kıtʿa kebîr ceng sefîneleri Sebte boğazından içerü duhûl etmek havâdisi şuyûʿ ve şimdiye dek Alikorne'ye vusûlleri muhtemel olmağla gerek Akdeniz'de ve gerek Karadeniz'de Moskovlu'nun bu kadar sefâini hazır bulunmak âhar düvelin aleyhine olduğu ve bâb-ı muhârebe meftûh olmak lâzım gelür ise korsan ve tüccâr sefînelerinden katı çok sefâin mesfûrlara munzam ve âhar devletlerden dahi kendülere imdâd olunmak gayri mübhem olmağla rekîz-i zamîrleri olan melʿaneti icrâya niyyet eyledikleri hâlde bu cemʿiyyet ile Rumeli ve Anadolu sâhillerine îsâl-i hasâr ve Devlet-i aliyye'nin tüccâr sefînelerini geşt ü güzârdan menʿ edecekleri âşikâr olup Devlet-i aliyye'nin mevcûd olan donanması aʿdânın donanmasından akall-i kalîl ve mukābele iktizâ etdikde esbâb-ı âdiyeye nazaran adem-i kifâyeti vâreste-i delîl olmağla mukābeleten li'l-hasm kesîr-i süfün-i islâmiyyeye himmet vâcibât-ı umûrdan olduğu ve hasmın donanmasına göre bahr-i Sefîd ve Siyâh'a başka başka donanmalar (212-a) tertîbi lüzûmundan başka Akdeniz içün iktizâ eden donanma mükemmel ve bî-kusûr ihrâc olundukdan sonra zikr olunan donanmaya hem-pâ ve kuvvet-i kalb olmak üzere misli bir donanma tertîb ve Bahr-i sefîd boğazında hareket eder gibi âmâde ve Karadeniz tertîbi dahi ayni ile bu vech üzere olup şimdiden tedârük ve tanzîmine sarf-ı irâde olunmak husûsları kezâlik erkân-ı devlet beyninde müzâkere ve nice kīl ü kālden sonra el-yevm Devlet-i aliyye'nin mevcûdu olan kırk kıtʿa kalyon baʿzı tasarrufât ile yüze iblâğ ve gāyet kesîr görülen masârifi dahi bir kalıba ifrâğ olunup mühimmât ve edevâtı şimdiden ihzâr ve tetmîm ve askerîsi öteden berü ahvâl-i deryâ ile âşinâ olan yeniçeriyân ortalarından tanzîm olunmak tasmîm olundu.