İşbu Şa'bân-ı şerîfin altıncı isneyn günü hâne-i hazret-i fetvâ-penâhîde sadrıa'zam hazretleri ve kudât-ı asâkir ve uzemâ-yi ricâl-i devlet hâzır oldukları hâlde tahrîrât-ı Mısriyye ve kethüdâ bey dâiresinde mesbûk olan mübâhasât ve mülâhazât der-miyân olunup sedd-i kebîrin ta'mîrine ve münâsib olan sevâhilden zehâir irsâline dâir olan ârâ-yi sâibe huzzâr taraflarından istihsân ve Yenbuğ iskelesine urbân-ı Harbin istîlâsı takrîbi ile hüccâc-ı Mısır'ın Medîne'ye azîmetleri mümkin olmayup emniyyet-i hac içün fî-mâ-ba'd şerîf hazretlerine aşîret-i mezbûre rehin vermek bâbında Mısırlının iltimâs etdikleri evâmir mugallata kabîlinden olduğu Medîne ahâlisinin ve Harb şeyhinin vârid olan kâğıtlarından müstebân olduğu (206-b) serd ü beyân ve sinîn-i çendinden berü vâridât-ı Mısriyyeyi ümerâ ve sâir mütegallibînden olan erbâb-ı bagy ü hevâ intihâb ve hac masârifini dahi tedrîcî Devlet-i aliyye'ye tahmîl ile irtikâb-ı kâr-ı nâ-savâb edecekleri zâhir olmağla bunlara bu def'a dahi şu zemînde evâmir tahrîrinden ise mütevekkilen 'al-Allah üzerlerine hareket Devlet-i aliyye'ye mahz-ı hayrdır kelâmını nakîbü'l-eşrâf efendi sevk ve huzzâra şevk gelüp re'y-i mezkûru tasvîb ve defterdâr-ı şıkk-ı evvel Feyzi Süleyman Efendi dahi filhakīka gılâl ü mâl-i kilâr ve irsâliyye ve mevadd-ı sâirenin tanzîmi için Mısır'a me'mûr olduğumda hâmil olduğum evâmir-i aliyye hutût-ı hümâyûn ile tevşîh ve bu def'a dahi tarafınızdan iğmâz taʿayyün eder ise berren ve bahren üzerinize hareket olunur tehdîdât-ı şedîdesi me'âllerinde tasrîh olunmuşiken tahdîdin îkāʿı meczûmları olmadığına binâen kâr-ger olmayup bundan böyle dahi bu makūle vaʿîdât ve ihâfeden kendülere te'essür hâsıl olmayacağı bedîhî olmağla hemen nakībü'l-eşrâf efendinin dediği gibi üzerlerine hareket lâzımdır ve ahâlî-i Mısır Abdi Paşa ve Hacı Ali Paşa ve kapudan paşa hazerâtından gayri vüzerânın birinden havf etmedikleri mukaddemâ tashîh olunup kapudan paşa birkaç sefîne ile bahren ve bir muktedir kimesne dahi asâkir-i vefîre ile berren taʿyîn olundukları hâlde ulemâ ve ocaklu beylerden müşme'iz ve müteneffir zevallerini mütemennî (207-a) olmalariyle memâlîkden kutr-ı Mısrı istisfâ eyleyecekleri hüveydâdır. Ancak ibtidâ-yı emirde bir şahs-ı kaviyyü'ş-şekîme mikdâr-ı vâfî asker ile İskenderiye'de bulunmak mühim olup zîrâ İskenderiye Mısırlu yedlerinde oldukca sefîneleri limana vusûlden menʿ ederler dedikde şeyhülislâm efendi hazretleri vüzerâ-yı ʿizâmdan birinin İskenderiye'ye taʿyîn olunmasını îmâ ve sadrıazam hazretleri Dimyat'ın muhâfazası lüzûmunu inbâ eylediler. Umûr-ı Mısriyyenin minvâl-i muharrer üzere nizâmı vakt-i âsâyiş ve ferağa mevküf olduğundan gayri bu sâl-i meyâmin ittisâlin hüküm ve mevsimi dahi güzerân etmekle şimdilik mes'ûlleri müsāʿadeye karîn ve ta'mîr-i sedd içün mübâşir taʿyîn olunup umûr-ı Mısriyyenin temşiyetinde ve matlûbâtın husûlünde fî-mâ-baʿd terâhî ihtiyâr olunmamak ve olunduğu sûretde Mısır üzerine bilâ-tereddüd hareket ve defʿ-i mazarrat-ı erbâb-ı gavâyete himmet olunmak emr-i meczûm-ı devlet-i ebed-müddetdir, me'âllerinde evâmir-i ekîde ve şedîde ısdârı münâsib görülüp bundan sonra Mısır'ın esbâb-ı nizâmı ve ehl-i bagy ve şakāvetin inʿidâmı o tarafların ahvâline vukūf-ı tâmmı olan Vezîr Cezzâr Ahmed Paşa'dan istihbâr ve askere lâzım olacak zehâirin şimdiden iddihârı ile sâir mühimmâtın ikmâl ve itmâmı bâbında lâzım gelen emr-i celîlü'l-iʿtibâr tarafına hitâben ısdâr ü tisyâr olunmak savâb-dîd-i hayır-hâhân-ı devlet olmağın meclise hitâm ve müşârün-ileyhe bu zemînde Dîvân-ı hümâyûn'dan (207-b) ve makām-ı sadâretden ısdâr-ı ahkâm olundu. Taʿyîn-i mübâşirân be-cânib-i Mısır ve nefy-i Abdullah Efendi kâtib-i kalyonhâ-yı sâbık ve emîn-i binâ-yı sedd şüden-i Hulûsî Ali Efendi ez-hâcegân-ı Dîvân-ı hümâyûn İttifâk-ârâ-yı devlet ile mîrhâc ihrâcı ve beher sâl lâzımü'l-irsâl olan surre ve muʿayyenât-ı sâirenin tahsîl ve vaktiyle mahalline tesyîr ve îsâli bâ- bında mukaddem ve kâr-güzâr bir mübâşirin cânib-i Mısır'a me'mûriyyeti muktezî olduğuna binâen sâbıkā baş-bâkî kulu olup muvakketen zabt etmek şartiyle me'mûriyyeti mukābelesinde sipâhîler ağalığı tevcîh olunan Eğribozlu İbrâhim Paşa-zâde Bekir Bey taʿyîn ve sedd-i binâ emânetine dahi umûr-ı âşinâ bir şahsın me'mûriyyeti lâzım geldiğine binâen sâbıkā kalyonlar kâtibi Doğramacı-zâde Abdullah Efendi Bâbıâlî'ye ihzâr ve dâmen-bûs-i hazret-i âsafî ile nâil-i şeref ü iʿtibâr oldukdan sonra ber-minvâl-i muharrer sedd-i binâ emâneti tarafına teklîf olundukda bâdi-i emrde kemâl-i memnûniyyet izhârıyla iktisâ-yı hilʿat edüp bu mukābelede kendüye mukābele-i suvârî pâyesi ve bilfiʿil mevkūfât mansıbı tevcîh olunduğundan gayri beş bin guruş nakden harcırâh ihsân ve Mısır'ın cizye evrâkı îsâlinden hâsıl olan menfaʿat ile dahi kîse-i iktidarı mel'ân olunmuşidi. Mûmâ-ileyh bir gün sonra Bâbıâlî'ye gelüp fesh-i azîmet etdiğini inhâ ve baʿzı aʿzâr îrâdıyla afvını istidʿâ etdiği âteş-i gazab-ı âsafîyi alev-gîr etmek der-akab Bozca adaya nefy ü iclâ olunup (208-a) hâcegân-ı Dîvân-ı hümâyûn'dan Hulûsî Ali Efendi'ye mevkūfât mansıbı ve zikr olunan harcırâh ve Mısır'ın evrâk boğçası hizmeti verilüp sedd emâneti ünvâniyle evâhir-i şehr-i Ramazanda cânib-i Mısır'a bâd-bân-güşâ-yı azîmet oldu.