Hâlâ şeyhülislâm-ı sellemehü's-selâm hazretleri hakkında zuhûr eden avârif-i behiyye-i mülûkiyye sudûr-ı kirâm hazerâtına sirâyet edüp binâberîn yevm-i mezkûrda hâlâ sadr-ı Anadolu olup birâder-i vâlâ-güher-i hazret-i fetvâ-penâhî Mehmed Sâdık Efendi'ye işbu sene-i mübâreke Şevvâli gurresinden i'tibâr ile sadâret-i Rum pâyesi ihsân ve ilm ü fazlı bâhir ve meziyyet ve haysiyyeti ke'ş-şems fi'l-hevâcir zâhir olan Müftî-zâde Ahmed Efendi'ye Şevvâlin beşinci günü i'tibâr ile kezâlik Rumeli sadâreti pâyesi tevcîh olunup her biri hân-ı kesîrü'n-nevâl-i hazret-i şehriyârîden hisse-mend-i bulga-i birr ü imtinân oldular.