Mûmâ-ileyhin erkân-ı devlet ile sû'-i imtizâcı ve umûr-ı mâliyyede ba'zı kazâyâ-yı fâside-intâcı (203-a) ve ale'l-husûs mâhiyyet ve haysiyyet zu'miyle her mâddede fart-ı i'tinâ ve "enâ lâ ğayru" da'vâ-yı pür-dayrına ibtilâsı umûr-ı defterîyi ta'tîl ve erbâb-ı masâlihi nâçâr mübtelâ-yı kāl u kīl eylediği sâmi'a-i hümâyûna vâsıl ve şehr-i mezkûrun onbeşinci hamîs günü mûmâ-ileyh defterdârlıkdan mün'azil olup bir zamân muhâsebe-i evvel kaleminde müstahdem ve ba'dehû zimmet ve mâlikâne halîfeliği ile makbûl ve mergûb-i ehl-i kalem olan Râşid Süleyman Efendi hazretlerinin umûr-ı mâliyyede mahâreti ve hidemât-ı me'mûresinde sadâkat ve istikāmeti zâhir olduğundan gayri muktezayât-ı hevâ vü hevesden sâlim ve havf-ı vüzerâ ile dâmen-keş-i muhdesât ü mazâlim olduğu hayır-hâhân-ı devlet-i ebed-müddet taraflarından sırren ve alenen inhâ ve bu sebeble hakkında teveccühât-ı mülûkâne rû-nümâ olmağla şeref-yâfte-i sudûr olan hatt-ı hümâyûn-ı mehâbet-makrûn mûcibince câh-ı vâlâ-yı defterî yevm-i mezkûrda müşârün-ileyh hazretlerine tevcîh ve ihsân ve bu tevcîh-i becâ ile hak budur ki aʿlâ vü ednâ ferhân ve cezlân kılındı.