Sâniyen müftî'l-enâm olan İbrâhîm Bey-efendi hazretlerinin bu defʿa dahi baʿzı hareketleri mizâc-ı hümâyûna muhâlif gelüp müddet-i meşîhatleri üç mâha resîde olmaksızın yevm-i mezkûrda azl ile İstavroz'da vâkiʿ sâhilhânelerinde ikāmetleri irâde buyuruldu. Sâbıkā Rumeli kazaskeri ve reisü'l- ulemâdan olan Abdurrahman Efendi-zâde semâhatlû Ahmed Atâullah Efendi hazretleri takaddüm-i zamânî ile pîşvâ-yı etrâb-ı ülü'l-elbâb ve meziyyet-i zâtiyye ile sâmi-kadr ü âlîcenâb olduklarından gayri evsâf-ı memdûhe ve etvâr-ı gayr-i makdûheleri gıbta-fermâ-yı selef ve hüsn-i hulk u mu'âşeret ve hilm-i müfrit u meskenetleri yâd-âver-i nâm-ı Ahnef ve bâ-husûs hakkāniyyet ve nısfet ile şöhret-gîr ve iffet ü tahâret-i zeyl ile müsellem-i bernâ vü pîr oldukları an-asıl ma'lûm-ı şehriyâr-ı kişver-gîr olup bu makūle dîndâr ve müteşerri' ve sâhib-i takvâ ve müteverri'înin mesned-i meşîhat-i islâmiyyede (202-b) vücûdu dîn ü devlete nâfi' olduğuna binâen yevm-i mezkûrda huzûr-ı mevâhib-mahsûr-ı mülûkâneye da'vet ve sadrıazam hazretleri kapuda henüz tevzî'-i mevâcibe bed' ve mübâşeret etmişiken ihzârlarında müsâra'at olunup lede'l-vürûd mevlânâ-yı müşârün-ileyh hazretlerine hil'at-i beyzâ-yı câh-ı iftâ iksâ ve yed-i atâ-yı mu'tâdlarına teslîm-i makālîd-i umûr-ı ulemâ kılındı.