Bundan akdem mîr-haclık hususiyçün münʿakid olan meclis-i meşveretde Cezzâr Ahmed Paşa'ya Şam eyâleti tevcîh olunur ise ol havâlide olan eyâletleri birer âdemisine arz u tahrîr ve muktezâ-yı vakt ü hâl budur diyerek hâh u nâ-hâh arzını yürüdüp ol havâliyi külliyyen nefsine ve dâiresi halkına tahsîs edeceği vâhimeleriyle umûr-ı Cerde'nin idâresi kaviyyü'l-iktidâr bir vezîr-i nâmdâra tahmîl olunmak ukalâ-yı devlet taraflarından re'y ü tedbîr olunup Vezîr Mikdâd Ahmed Paşa'ya cerdecilik ile Trablus eyâleti tevcîh olunmuşidi. (201-a) Müşârün-ileyhin debdebe ve mikneti zâhir ve bâ-husûs pederlerinin beyne'l-ekâbir ve'l-asâgir vakʿ u şânı ke'l-meseli's-sâir olduğundan Cezzâr Paşa'ya vahşet târî ve giderek maraz-ı tehâsüd ve tebâguz sârî olarak miyânelerinde adem-i imtizâc hâletleri vukūʿu ashâb-ı hall ü akdin hâtır-güzârı olduğundan başka bu iʿtizârât vezîr-i müşârün-ileyh tarafından dahi îrâd ve Trablus'un sarf u tahvîli hususunda etrâfdan istimdâd edüp bu garaza mebnî delîl başı İbrâhîm Ağa'ya beylerbeyilik ile cerde başbuğluğu ve Trablus eyâleti tevcîh ve metāyâ-yı istiʿcâle suvâr olarak savb-ı maksûda luhûku emr ü tenbîh olunup paşa-yı mûmâ-ileyh Âsitâne'den hareket ve birkaç merhâle azîmet etdiği esnâda sadrıazam hazretleri vâsıl-ı der-i devlet olup paşa-yı mûmâ-ileyh bî-tâb u kudret ve âhâd-i nâsdan maʿdûd bir şahs-ı bî-şöhret olduğundan gayri Azm-zâdelere katı çok zamân hizmeti hasebiyle Trablus'a vardıkda Azm-zâdelüler başına müctemiʿ olup ol havâliyi ifsâddan hâlî olmayacaklarını serd ü beyân ve cerdecilik Cezzâr Pa- şa'nın yine re'yine havâle olunup İbrâhîm Paşanın tevkîfini istihsân eylediklerine binâen bulunduğu mahalde ikāmetiyçün paşa-yı mûmâ-ileyhe fermân-ı âlîşân gönderilüp Cezzâr Paşa'ya dahi bu mazmunda (201-b) makām-ı sadâretden kāime gönderilmişidi, Müşârün-ileyh tarafından bu defʿa der-i devlete vürûd eden tahrîrâtda hazînedarlık hizmetinde olup hâlâ Hama mütesellimi olan Süleyman Ağa'nın umûr-ı cerdeyi idâreye liyâkati mastûr ve istihdâma şâyân olduğu muharrer ve mezkûr olmağla istidʿâsına binâen avâtıf-ı aliyye-i hazret-i cihândârîden ağa-yı mûmâ-ileyhin beylerbeyilik ile Trablus Eyâleti tevcîh ve ihsân ve selefi Delîl İbrâhîm Paşa'ya Karahisâr-ı sâhib Sancağı tevcîh olunup baʿde'l-îd me'mûr olacağı mahalle azîmet içün âmâde olması emr ü fermân buyuruldu.