İsmail cânibi seraskeri maʿiyyetine me'mûr Anadolu eyâletinin zuʿamâ ve erbâb-ı tîmârının İsmail'de tûl-i ikāmetleri hasebiyle hâlleri perîşân ve bâ-husûs seraskerleri Vezîr Abdi Paşa'nın Sofya'ya nakl ü hareketi bakā ve sebâtlarına tezelzül-resân olup âhırü'l-emr teferrük ve tesettütleri vukūʿ ve meks ü tevakkufları zımnında zâbitlerinin pend ü nasîhati gayr-i mesmûʿ olup cânib-i mezkûrun askerden tahlîyesi mugâyir-i muktezâ-yı hâl ve istihkâm ve takviyesi esbâb-ı zâhiriyyeyi istihsâl kabîlinden olduğuna binâen her ne hâl ise şimdilik eyâlet-i mezkûrenin zuʿamâ ve erbâb-ı tîmârı envâʿ-i tehdîd ve tahvîf ile tevkīf ve yerlerine serîʿan tertîb olunan asker İsmail'e vusûlünde memleketlerine avdetleri içün kendülere ruhsat verileceği vaʿd olunup eyâlet-i mezkûreye bedel olmak üzere Rumeli taraflarında mütemekkin olup dîvân kaleminde isim ve resimleri musarrah olan aʿyân-ı memleket ve zâbitân-ı vilâyet taraflarından tahammüllerine göre piyâde ve suvâri asker tertîb ve İsmail cânibine mukaddem mübâşirler ile sevk ü tesrîb olunduğundan gayri Karaman Eyâletinin bilcümle zuʿamâ ve erbâb-ı tîmârı dahi cânib-i mezkûr seraskeri maʿiyyetine bu defʿa müceddeden ta'yîn ve Trabzon eyâleti mukaddemâ Soğucak'a me'mûr olduklarına binâen bu âna dek hareket etmedikleri vâsıl-ı rütbe-i ilmü'l-yakîn olup isti'câllerini hâvî mü'ekked emr-i âlî şeref-sudûr ve Sivas Eyâleti dahi (199-b) bir müddetden berü Bender'de emr-i muhâfazaya kıyâm ve Anadolu eyâleti misillü bunların hâli dahi perîşân ve bî-nizâm olmağla Akkerman kal'asını ta'mîr ve hendeklerini tathîr edüp Ramazan gurresinde vilâyetlerine avdetleri içün emr-i âlî gönderileceği va'd olunduğu ve sâbıkā Kocaili sancağı mutasarrıfı ve Pirezen muhâfızı olan İsmâîl Paşa'ya müceddeden Rumeli beylerbeyliği pâyesiyle Yanya Sancağı tevcîh ve ihsân ve Özi'de Vezîr Çerkes Hasan Paşa maʿiyyetinde edâ-yı hizmet eylemesi emr ü fermân ve sâbıkā Kars muhâfızı Dulkadır-zâde Ömer Paşa'ya eyâlet-i Maraş tevcîh olunup Kars'a azîmet etmiş ise dahi avdet etmesi ve Palu beyi ve sâir ol havâlide olan ümerâya Anadolu veyâhud Rumeli cânibinde istihdâm olunacakları i'lâmiyle matlûb olan asker ile hâzır ve bundan sonra ısdâr olunacak emr-i âlîye nâzır olmaları ve Maraş Eyâleti bundan akdem Kars cânibine me'mûr olup adem-i azîmet zımnında baʿzı aʿzâr-ı vâhiye îrâd etmişler idi, gerek Maraş ve gerek Diyâr-ı bekir eyâletleri bi-eyyi hâl me'mûr oldukları mahalle azîmetleriyçün emr-i âlî irsâl ve İşboz ve Podgoriçe kal'alarını hasr u tazyîk ve sekenesinin esbâb-ı sâmân ve râhatlarını tefrîk eden İskenderiye mutasarrıfı Mahmud Paşa'ya fî-mâ-ba'd kal'ateyn-i (200-a) mezkûreteyne adem-i müdâhale ve ahâlisine mu'âmele bi'l-mücâmele etmek şartiyle kapudan paşa takrîri üzere İskenderiye Sancağı ibkā ve Ohri Sancağı dahi Mehmed Paşa-zâde'ye tevcîh ve i'tā olunup Filibe'den Kızanlık'a ve andan cisr-i Mustafa Paşa'ya ve Edirne'ye gelince yolların emniyyeti ve ebnâ-yı sebîl ve fukarânın râhatı meslûb olmağla bu makūle şakāvete cesâret eden tâgī ve bâgīleri tedmîr ve istîsâl bâbında Edirne bostancı başısına mü'ekked emr-i âlî irsâl ve ada muhâfızı olan Şemseddîn Bey mansıbı olan Çirmen'e gelüp Dukakin mutasarrıfı Ali Paşa ada muhâfazasına ve Boğdan başbuğu ve Bucak'da olan Arslan Paşa kethüdâsı maʿiyyetlerinde mevcûd olan top ve mühimmâtı İsmâîl seraskerine teslîm ve kendüleri dahi maʿiyyetlerinde olan asâkir ile Bender muhâfazasına gidüp hizmet-i lâzımede sa'y-i azîm etmeleri tenbîh olundu. İhsân-ı vezâret be-Mahmud Paşa Ağa-yı yeniçeriyân-ı esbak be-izâfe-i eyâlet-i Belgrad ve azl-i Vezîr Sırrı Selim Paşa ve tevcîh-i Hanya ve Köstendil Sugūr-ı islâmiyyede vâki' kılâ'-ı mansûreden Belgrad-ı dârü'l-cihâdın dâimâ esbâb-ı muhâfazası mükemmel ve şîrâze-i nizâmı gayr-i münhal olmak matlûb olup muhâfazasına me'mûr olan vulât-ı izâmın dahi serhadd umûruna vukūf ve ıttılâʿları mültezem (200-b) ve kable'l-iktizâ tetmîm-i mehâmm lâzımesinde ikdâmları ehemm olduğundan gayri serhadlerde olan ocaklunun zabt u rabtları ağalıkdan çerağ olunan vüzerâya ehven ve muktezâ-yı cinsiyyet üzere her vazʿ u tavırları serhadlüye müstahsen görüleceği mukaddemâtı serd ü beyân olunarak Selîm Paşa'nın vücûb-i azli inhâ ve işbu şehr-i Receb'in yirmisekizinci isneyn günü müşârün-ileyh Belgrad'dan azl ve Hanya sancağıyla tahkīr ve izrâ olunup Belgrad muhâfızlığı bundan akdem baʿzı evsâf-ı memdûhası sebt-i sahîfe-i beyân ve beylerbeyilik ihsâniyle mazhar-ı lûtf-i pâdişâh-i gîtî-sitân olan Mahmûd Paşa'ya bâ-rütbe-i vâlâ-yi vezâret tevcîh ve inâyet ve sâbıkā Hanya mutasarrıfı Livadyalı Vezîr Hasan Paşa dahi Köstendil Sancağıyla mazhar-ı birr ü mekremet buyuruldu.