Sâbıkā Mısır vâlîsi sadr-ı esbak Silâhdâr Mehmed Paşa'nın Mısır'dan azli ve müddet-i vâfireden berü bilâ-mansıb İskenderiye'de ikāmeti ıztırâb-ı hâline ve perîşânî ve mağdûriyyetine bâdî olup bu makūle mağdûr (196-a) ve perîşân-hâl olanlara merhamet muktezâ-yı meşreb-i pâdişâh-ı nîgû-haslet olduğuna binâen işbu şehr-i Receb'in on dördüncü isneyn günü müşârün-ileyhe Selânik ve Kavala sancakları ber-vech-ı arpalık tevcîh ve ihsân ve birkaç seneden berü merfûʿu'l-vezâre ve mağdûr ve bî-çâre olan Moralı Ahmed Paşa hakkında dahi şefekat-ı mülûkâne nümâyân olup ibkā-yı vezâretle İnebahtı Sancağı inâyet ve Eğriboz sancağı sâbıkā Selânik mutasarrıfı vezîr Silâhdar Mustafa Paşa'ya ve Hanya sancağı sâbıkā Eğriboz muhâfızı olan Livadyalı Vezîr Hasan Paşa'ya tevcîh buyurulup kapu kethüdâlarına huzûr-ı âsafîde ilbâs-ı hilʿat olundu.