Konya'da seccâde-nişîn-i tarîk ve mâlik-ı zimâm-ı erbâb-ı vecd ü tahkīk olan Çelebi Efendi'nin sadr-ı sâbık vaktinde nây-ı gülûsundan nefesini münkatiʿ ve kudûm-ı peyk-ı ecel ile rûh-ı pür-fütûhu münteziʿ olup tahsîl-ı makām irâdesiyle evlâd-ı Hazret-ı Mevlânâ'dan küçük ve büzürk cemm-ı gafîr ile Âsitâne'ye vürûd ve tarafeyn olmak takrîbiyle ve ahad-ı hümânın tercîhi bâbında der-ı imkân mesdûd olup leyte ve laʿalle ile imrâr-ı evkāt olunur idi. Sadrıazam hazretleri Âsitâne'ye vusûl buldukda tarafeyn tekrâr beyân-ı hâl ve katʿ-ı rişte-i kīl ü kāl murâd eylediklerinde Konya'nın her hâline vukūf-ı tâmm-ı olan sadr-ı müşârün-ileyh hazretleri istidʿâ-yı tarafeyne adem-i müsaʿade ve yine evlâd-ı zükûrdan olup kurb-i neseb ve tahâret hasebi beyyin olan İsmâʿîl Çelebi-zâde Esseyyid Mehmed Efendi'ye meşîhat-ı mezkûre münâsib idüğü ʿatabe-i ulyâ-yı cihândârîye telhîs ve ifâde olunup mûcibince hatt-ı hümâyûn şeref-rîz-i sudûr olmağla der-akab mûmâ-ileyhe tevcîh ve inâyet ve defʿ-ı şûr u nizâʿa himmet olundu.