Bundan akdem tuğu ve sancağı refʿ olunan Vezîr Râif (194-a) İsmâil Paşa'nın vâlî olduğu memleketlerde zulm ü taʿaddîsi efzûn ve bâ-husûs mukaddemâ muhâfazası uhdesine ihâle olunan serhadd-i Belgrad'ın ihtilâline bâʿis olunduğu maʿlûm-ı hümâyûn olduğuna binâen mazhar-ı kahr u gazab olup menfâsına azîmet eder iken Kara Kethüdâ-zâde kapucu-başı Ali Bey erişüp cezâsını tertîb ve ser-i maktûʿunu şâtıriyle Âsitâne-i saʿâdet'e baʿs u tesrîb edüp derhâl sarây meydânına vazʿ u nihâde ve mest-i câm-ı nahvet ü gurûr olan gerden-keşân-ı zamâneye فَاعْتَبِرُوا يَا أُولِي الْأَبْصَارِ âyet-i şerîfesinin maʿnâsı beyân ve ifâde kılındı. Tercüme: Müşârun-ileyh devr-i Sultân Mahmûd Hânîde yeniçeri ağalığından vezâret ile ber-murâd olan Vezîr Kürd İbrâhîm Paşa'nın semere-i fu'âdı olup bin yüz otuz sekiz târîhinde pederi Bağdâd ağası iken nefs-i Bağdâd'da tevellüd ve yevmen fe-yevmen neşv ü nemâ kesbiyle sinn-i kühûlete tesâʿud ve kadr-i müşterek muʿârefe nâ'il ve oldukca zâtında meleke ve haysiyyet hâsıl olmuşidi. Müşârun-ileyh pederiyle katı çok zamân seyr-i emâkin ve büldân ve umûr-ı maʿâşda olan fikr-i amîki pederine nümâyân oldukda hâl-i vezâretinde müşârun-ileyhi kethüdâlık hizmetine îsâl ve ol dahi idâre-i dâ'ire ve celb-i menâfiʿ ve umûr-ı sâ'irede izhâr-ı kemâl edüp baʿdehû Âsitâne'ye kudûm ile dâ'ire-i hâcegâne dâhil ve baʿzı menâsıba eğerçi mütevâsıl olmuşidi. (194-b) Ancak îrâd ve iddihârı maʿdûm olduğundan müzâyaka ve usrete dûçâr ve nâçâr baʿzı ashâb-ı servet ve devlete âmed-şüd ile evkāt-güzâr iken tâliʿinde olan nühûset ve idbâr münselib ve saʿâdet ve ikbâle münkalib olup baʿzı mukarrebîn taraflarından tasahhüb ve bu vesâ'it ile hüdâvendigâr-ı sâbık merhûma kesb-i takarrüb eylediğine binâen kimyâ-âsâr olan enzâr-ı mülûkiyye ile külçe-i mağşûşi’l-hâl-i mâhiyeti kâmilü’l-aʿyâr ve giderek Darbhâne-i âmire emânetiyle nukre-i kadr ü rifʿati sikke-zede-i iştihâr olup bâb-ı vâlâ-kıbabı merciʿ-i mevâlî ve abîd ve cûybâr-ı câh-ı iʿtibârı bâʿis-i reşef-i dil-teşnegân-ı ümîd olmuşidi. Seferler evâ'ilinde vekâlet-i riyâset ile Âsitâne'de kâr-sâz-ı hutûb-ı cumhûr ve seferler hitâmına dek müsteşâr ve mü'temen-i cüz'iyyât ve külliyyât-ı umûr olup cülûs-ı hümâyûn vukûʿunda vekâlet-i riyâsetden münʿazil ve sukût-ı kevkeb-i ikbâlinden münfaʿil olmuşiken nakd-gîrân-ı asrın hüsn-i terbiyyeleriyle hizmet-i ûlâsına iʿâde ve Ordu-yı hümâyûn avdetinde asâlet ile mesned-i riyâsete pâ-nihâde olup Derviş Paşa sadâretinde zehrâbe-i azl ile mürrü'l-mezâk ve nefy ü tağrîb ile bedr-i kadri giriftâr-ı ukde-i mahâk olmuşidi. Bir müddetden sonra vezâret rütbesini tahsîl ve Mısır ve Kandiye ve Mora ve Belgrad misillû menâsıb-ı cesîmeye tasarruf ve tevellî ile eyyâm-ı maʿdûde-i ikbâlini tekmîl edüp (195-a) âhır-ı kâr bâlâda zikr olunan seyyi'ât sebebi ile terk-ı mâl ve serv-i râh-ı dûr ü dırâz-ı âhirete sefer eyledi. Müşârün-ileyh tasvîr-i nukūş-ı mekr ü hîlede Mânî ve tertîb-ı mukaddemât-ı keyd ü hudʿada bî-müdânî ve aʿdâ ve ehibbâsının fark u temyîzi müşkil ve rü'yet-ı umûr-ı devletde mühmil ve bâ-husûs salâh u takvâdan bî-behre ve zişt-huy ve türş-çehre olduğundan gayrı kalbinde eser-i merhamet maʿdûm ve akrabâsından leyle-i aşâya muhtâc baʿzı muhadderât ve mesâkîn olup imdâd u iʿânetden mahrûm oldukları kâffe-i nâsa maʿlûm ve adem-ı sıla-i rahm kātıʿ-ı aʿmâr olduğuna nazaran âsâr-ı inkisârlarına düçâr ve şikestegî-i hâtırlarından neş'et eden belâya giriftâr olduğu emr-ı meczûmdur.