Müşârün-ileyh Devlet-i aliyye'de üç defʿa şeyhülislâm olan Dürrî-zâde Mustafa Efendi merhûmun necl-i necîbi olup bin yüz kırk iki senesinde kadem-nihâde-i sahn-ı şuhûd ve kırk sekiz târîhinde henüz fârik-i miyân-ı bûd u nebûd iken medrese ru'siyle sâhib-vücûd olup bedr-i serîʿü's-seyr gibi devre-i muʿtâdeyi dâ'ir ve yetmiş iki târîhinde Selanik mevleviyyetiyle hâ'iz-i rehîne-i mefâhir olmuşidi. Baʿde'l-infisâl zâdegân hakkında istiksârı baʿîdü'l-ihtimâl olan tafra ve takaddüm-i âdî (193-b) müşârün-ileyh hakkında dahi meşhûd ve yetmiş sekiz târîhinde Mekke-i mükerreme pâyesiyle nakd-i râyic-i iʿtibârı maʿdûd olup seksen târîhinde bi'l-fiʿil kādî-i İstanbul ve seksen dokuzda Anadolu sadâretine mevsûl ve doksan ikide Rumeli kazaskerliğiyle memnûn ve doksan yedide tekerrür ile kadr ü şânı dü-bâlâ ve efzûn olmuşidi. Sene-i mezkûre hılâlinde şeyhülislâm ve iki seneye karîb hallâl-i müşkilât-ı enâm olup bâlâda zikr olunan esbâb ile mesned-i fetvâdan maʿzûl ve semt-i Hicâz'a bahren azîmet etmek üzere Gelibolu'ya mersûl kılınup sebeb-i gayr-i hafî ile tedrîcî vücûduna müstevlî olan sû'-i kinye ve istiskā illetleri bu defʿa zuhûr eden hareket-i kasriyye ile kabûl-i tezâyüd ve belde-i merkūmede vefât eylediği haberi işbu Recebü'l-ferdin altıncı pazar günü der-i devlete vârid oldu. Müşârün-ileyh perverde-i pister-i iltifât u taʿazzüz ve der-âgûş-kerde-i şâhid-i gül-çehre-i tahayyüz olup hilm ü tevâzuʿla şöhret-gîr ve celb-i kulûb-ı nâsda sâhib-i azîmet ve teshîr olduğundan gayri umûr-ı dünyâ-yi denî nazar-ı iʿtibârında lâşey ve teveccüh-i ikbâl-i serîʿü’z-zevâl indinde mânend-i keyfiyyet-i mey olup sahîfe-i hâtırı nokta-i gıll ü gışşdan hâlî ve mütehayyizler hakkında mürüvveti vâfir ve himmeti âlî idi.