Mevsim-i bahâr-ı bedîʿü'l-âsâr kudûmiyle havalardan kesâfet ve sahrâlardan sıklet zâ'il ve her bir mahal sebze-zâr-ı cinâna mümâsil olup ebr-i Nisân ezhâr-ı çemen-sitâna ifâze-i hayât-ı letâfet ve nesîm-i fazl-ı rebîʿ şükûfe-zâr-ı hazân-dîdeye nefh-i rûh-ı terâvet etmekle mürgân ûlî-ecniha sû-be-sû birer nihâl-i nevrüsteyi makām ve andelibân-ı bî-nevâ şâh-ı gülde birer gûne âğâz ile bende-i usûl-i makām eylediklerinden gayri rû-yı deryâ meclâ-yı sâfdan mücellâ ve nezâret ü seyrinde füzûnî-i ferah u neşât hüveydâ olup fe-li-hâzâ tabʿ-ı maʿâlî-nebin-i mülûkânede meyl-i tenezzüh ve tenakkul bedîdâr ve rağbet-i temâşâ-yı sanʿat-ı Kirdigâr-ı âşikâr olduğuna binâen şehr-i mezkûrun yedinci isneyn günü sâhil-sarây-ı Beşiktaş'ı nakl-i hümâyûnlariyle reşk-endâz-ı bağ-ı irem buyurdular.