Şehr-i mezkûrun dördüncü cumʿa günü sadrıaʿzam kethüdâsı olan Seyyid Mehmed Hayri Efendi ve çavuş-başı Hamdullah Bey-efendi ve mektûbcu Mehmed Râşid Efendi defʿaten azl olunup defterdâr-ı şıkk-ı evvel olan Ahmed Nazîf Efendi hazretlerinin bu âna dek muhavvel-i ʿuhde-i hamiyyeti ve müfavvaz-ı zimmet-i himmeti kılınan menâsıb-ı cesîme-i Devlet-i aliyye'de sadâkat-ı kâmile ile hizmeti sebkat ve bâ-husûs defterdarlığı hengâmmda medâr-ı kuvvet ü miknet-i (191-a) islâmiyye ve bâ'is-i idâre-i umûr-ı saltanat-ı aliyye olan Beytü'l-mâl-i müslimîni kemâl mertebe sıyânet ve isrâf u itlâfdan cânib-i mîrîyi kemâ-yenbağî himâyet eylediği maʿlûm-ı erbâb-ı akl u basîret olduğundan gayri umûr-ı mâliyye idâresine me'mûr olan ve kisedârân-ı aklâm ve sâir hâss u ʿâmm miyânelerinde muhâfaza-i beytü'l-mâl keyfiyyeti resîde-i rütbe-i tahakkuk ve iştihâr ve refte refte vâsıl-ı sâmiʿa-i hazret-i şehriyâr-ı bâ-vakâr olmağın bu makūle sadâkat-kârân-ı Devlet-i aliyye'den cilveger-i meclâ-yı zuhûr olan reftâr-ı sıdk u istikāmete hüsn-i mücâzât ve etvâr-ı ihlâs ve safvete pâdâş ve mükâfât sâir ricâl-i devlet-i ebed-ittisâle tâziyâne-i şevk olacağı pîrâmen-güzâr-ı kalb-i pâdişâh-ı sütûde-sıfât olduğuna binâen mahzâ sebkat eden hizmet-i sâdıkānesine mukābele kasdiyle sedâret-i uzmâ kethüdâlığı müşârün-ileyh hazretlerine tevcîh ve huzûr-ı âsafîde hilʿat-i semmûr-ı fâ'izü's-sürûr ilbâs ile câh-ı iʿtibârı terfîʿ ve tenvîh buyurulup defterdarlık mansıb-ı ulyâsı dahi beyne'n-nâs iʿzâm-ı kadr ü câhı müstefîz ve şâyiʿ ve evsâf-ı ber-güzîdesi tanîn-endâz-ı mesâmiʿ olan Feyzi Süleyman Efendi hazretlerine ve Dîvân-ı hümâyûn çavuş-başılığı kudemâ-yı hâcegân-ı Dîvân-ı hümâyûndan ve erbâb-ı nasâfet ve sükûnetden Bekir Paşa-zâde Süleyman Bey-efendi hazretlerine ve mektûbculuk kalem-i mezbûrun baş halîfesi olup ashâb-ı kıyâsetden İbrâhim Efendi'ye tevcîh olundu. (191-b)