İstanbul'dan hâric memâlik-i mahrûsede dirâyet ile kesb-i şöhret eden aʿyânların baʿzılarını Âsitâne-i saʿâdet'e celb ve münâsib hizmetlerde istihdâm ile tecrübe etmek ve kaht-ı ricâl iddiʿâsıyla müceddeden âdem yetişdirmek vâdilerinde Varnalı-zâde Selim Ağa'yı ve İznikli Ali Bey'i ve sadr-ı maktûl Âsitâne-i saʿâdet'e getürdüp rağbeten ve rehbeten vâfir akçelerini aldıktan sonra tevcîhâtda Selim Ağa'yı topcu-başı ve Ali Bey'i baş-bâkī kulu nasb etmiş idi. Menâsıb-ı Devlet-i aliyye öteden berü emekdâr ve mücerrebü'l-etvâr zevâta ve Âsitâne-i saʿâdet-âşiyânede ikāmet ile birer takrîb istîhâl ve istihkāk kesb etmiş kimesnelere münhasır ve mahsûs olup tevlîd-i ebâtîl eden berâtîl ile tahsîl-i menâsıb ve katʿ-ı merâtib edenlerin encâm u ākıbetleri vahîm ve uhdelerine ihâle olunan hidemât müşevveş ve sakīm olmak umûr-ı mücerrebeden olduğuna binâen sadr-ı maktûlün derece-i istidrâcı resîde-i rütbe-i nihâyet ve ser-i bî-devleti galtân-ı meydân-ı mezellet oldukdan sonra mûmâ-ileyhimâ mansıblarından azl olunup mînâsı fâsid olan mansıblarının hayrından mahrûm olarak engüşt-gezâ-yı nedâmet ü efsûs ve nefrîn-hân-ı baht-ı menhûs oldular. Garîbe: Mûmâ-ileyh Ali Bey azl olup infiʿâl-i infisâl (192-a) ile hânesine gider iken hılâl-i tarîkde iki nefer tavâşî ağalar ile bir harem arabasına tesâdüf edüp âdet-i belde üzere avdet veyâhud bir mahalle sapmak lâzım iken zikr olunan ağalar riʿâyet-i âdetde merkūmun taksîr ü tecâhülünü fehm etmeleriyle hemen kuvve-i gazabiyyeleri heyecân edüp mîr-i mûmâ-ileyh üzerine tarafeynden hücûm ve darabât-ı asâ ile her birini mânend-i mûm eyledikleri mütevâtir olmağla bu hâdise-i acîbenin zuhûru mîr-i merkūmun nuhûset-i tâliʿinden ve resm-i Devlet-i aliyye'yi adem-i idrâkinden iktizâ eylediği muhtâc-ı beyân değildir. neʿūzü bi'llâhi mine'r-rezâle