Cezâyir ve sevâhilde vâkiʿ memâlik-i islâmiyyeyi ve ale'l-husûs rûy-ı deryâda geşt ü güzâr eden tüccâr ve züvvârı mazarr-ı eşrâr-ı küffârdan muhâfaza kasdiyle beher sâl tertîb ve tesyîr olunan Donanma-yı hümâyûn bu sene-i ʿamîmetü'l-meymenede dahi ʿavn-i melik-i müteʿâl ile mükemmelen techîz olunup vakt-i ihrâcı hulûl eylediğine binâen işbu Receb-i şerîfin üçüncü yevm-i hamîs Kapudan-ı Deryâ Vezîr Gâzî Hasan Paşa hazretleri Tersâne-i ʿâmire'den refʿ-i lenger-i ikāmet ve yalı köşkü pîşgâhında âlây gösterüp sadâ-yı raʿd-âşûb-ı tûb ile kulûb-ı aʿdâya ilkā-yı heybet ve haşyet etdikden sonra ber-vech-i muʿtâd dûş-ı hamiyyet-pûşuna iksâ-yı semmûr-ı fâizü's-sürûr ve maʿiyyetinde olan kapudanlara ve sâir rü'esâya ilbâs-ı hilaʿ-ı müstevcibü'l-hubûr kılındı. Tevcîh-i eyâlet-i Haleb be-Vezîr Çerkes Hasan Paşa ve me'mûriyyet-i o be-muhâfaza-i Kalʿa-i Özi ve vâlî-i Kandiye şüden-i Vezîr Mustafa Paşa Yazıcı-zâde Bundan akdem Kandiye Eyâleti tarafına tevcîh olunan Vezîr Çerkes Hasan Paşa vüzerâ-yı şecâʿat-intimâdan olup kapusu dahi oldukca munta- zam olduğuna binâen sugūr-ı islâmiyye'de istihdâmı (190-a) re'y-i hasen ve rekz-i hayl mümkin olan mahallerde bulunması müstahsen olmağla işbu şehr-i Recebü'l-ferdin ikinci çarşamba günü avâtıf-ı aliyye-i mülûkâneden Özi muhâfazası şartiyle eyâlet-i Haleb müşârun-ileyhe ve üzerinde olan Kandiye eyâleti İnebahtı muhâfızı olup her hâlde şâyân-ı merhamet ve şefekat-i pâdişâhî olan Yazıcı-zâde Vezîr Mustafa Paşa'ya tevcîh ve ihsân olundu.