وما توفيقي الا بالله Benim vezîriazam ve vekîl-i mutlakımsın seni tahiyye-i şâhânem ile taltīf eylediğimden sonra maʿlûm olsun ki selefin makhûr Halîl Paşa hevâsının galebesiyle (189-a) salâh tarafına meyl etmeyüp ve celb-i [mâl] sevdâsıyla taşralara bakmayup zuʿafâ ve ağniyânın ıztırâblarına ve devletimin emekdâr ve hademlerine mahsûs ve menâfiʿi kendü etrâfına tah- sîs ile hırmânlarına ve umûr-ı devletime temşiyetde hod-re'ylik ile hilâf-ı rızâ-yi mülûkânem nice etvâr-ı nâ-şâyesteye cesâreti hasebiyle ulemâ ve ricâl ve ocaklarımın tenfîrlerine bâ'is olduğundan tamaʿ-ı hâmı ve hâin-i dîn ü devlet ve azlam-ı ibâd olmağla tebdîli ve izâlesi îcâb etmişdir. Ve sen vüzerâ-yı ʿizâm beynlerinde salâh u diyânet ve hazar u seferde reʿâyâ ve asker-perverlik ile mevsûf ve devletime sadâkat ile hizmet edeceğin meʾmûl olduğundan vekâlet-i mutlakam hizmet-i celîlesi uhde-i liyâkatine taklîd olunmuşdur. İmdî umûr-ı cüz'iyye ve külliyyede "ve-şâvirhüm fi'l-emri fe-izâ azemte fe-tevekkel ʿalâllāh" nass-ı kerîmiyle amel ve ibâd-ı bilâdın himâyetlerine ve zalemenin ber-muktezâ-yı şerʿ-ı şerîf cezâ-yı lâyıklarının icrâsına ve serhadlerin nizâmlarına ve envâʿ-ı mühimmât-ı lâzımenin tedârük ve tesviyesine ve Âsitâne'nin gerek kalʿalarının ve gerek sâir kifâyet mertebesinde iktizâ eden zahîrelerinin vakt ü zamâniyle tedârük ve ihzârlarına ve te'lîf-i kulûba saʿy ü ictihâd eylesin sen ve tarîk-i sedâdda (189-b) seninle bile olup devletime sadâkat edenler haklarında duʿâ-yı hüsrevânem bile olmağla Rabb-i zülcelâl hayırlu işlere muvâfık eyleye, âmîn. İntehe'l-hatt-ı sultânî.